PS: Meta iu kundërvu brutalisht reformës në drejtësi dhe SHBA- BE- së
Felaj: Ishte zgjedhje e tjetërkujt, jo e presidentit
Kundërvënie brutale ndaj reformës në drejtësi dhe partnerëve ndërkombëtarë. Kështu e ka cilësuar dje mazhoranca e majtë vendimin e Presidentit të Republikës Ilir Meta për të dekretuar Marsida Xhaferllarin si anëtare të Gjykatës Kushtetuese, pavarësisht kanë kaluar të gjitha afatet që i jep Kushtetuta për një emërimin të tillë. Nëpërmjet ministres së Shtetit për Marrëdhëniet me Parlamentin, shumica e majtë ka shprehur qëndrimin e saj ndaj këtij veprimi, duke theksuar se dekreti i kreut të shtetit nuk ka legjitimitet kushtetues. "Edhe njëherë Ilir Meta iu kundërvu reformës në drejtësi dhe Shteteve të Bashkuara e Bashkimit Europian, duke dekretuar kundër ligjit dhe kundër qëndrimit të tyre, me zero legjitimitet kushtetues e ligjor, një gjykatëse mbrapa liste", - shkroi dje Spiropali në reagimin e vet. Më tej ajo shprehu keqardhje për këtë veprim të Presidentit, duke theksuar se edhe një herë kjo vendimmarrje tregoi se ai është kundër reformës në drejtësi. "Edhe njëherë kundërvënia brutale e Ilir Metës ndaj prioritetit themelor të vendit, drejtësisë, na bën të ndjehemi keq për Presidentin e Republikës. Edhe njëherë, Ilir Meta dha një shembull spektakolar për ta kuptuar kush ende nuk e ka kuptuar, se reforma në drejtësi ndan thellë e qartë shumicën qeverisëse dhe parlamentin e vendit, nga fronti i atyre që me në krye Ilir Metën, i bashkon kundër nesh frika nga drejtësia", - shkroi Spiropali.
FELAJ
Ndërkohë që kryetarja e Komisionit të Sigurisë, Ermonela Felaj duke folur dje për këtë vendim të presidentit u shpreh se ishte diçka që mazhoranca e priste, por theksoi se ai nuk ka asnjë vlerë. Sipas saj, kreu i shtetit e pati mundësinë të zgjidhte anëtarin që i takonte dhe në tejkalim të afatit 30 ditor.
CEREMONIA
Meta nuk e njeh procesin e ndjekur nga Kuvendi për zgjedhjen e dy anëtareve të reja dhe as emërimin automatikisht të Arta Vorpsit. Për këtë arsye ai nuk do të organizojë ceremoninë e betimit që është e domosdoshme që anëtare te reja të fillojnë detyrën.
Burime nga PS bëjnë të ditur se deri më tani nuk ka një zgjidhje për këtë ngërç.