Meta akuzon kreun e KED: Lojë pa turp, asnjë fëmijë rrugaç nuk i bën
Presidenti emëron Marsida Xhaferllarin anëtare të Kushtetueses: Dvorani ushtar partie "Diplomatë të korruptuar, s'ngeli budalla pa e kuptuar"
Presidenti Meta dekre toi dje emërimin e Marsida Xhaferllari, gjyqtare të Gjykatës Kushtetuese. Presidenti firmosi dekretin për emërimin e vakancës së tij të dytë. Presidenti Meta e bëri emërimin e anëtares së re në tejkalim të afatit 30 ditor që i jep atij Kushtetuta. Presidenti e argumentoi vonesën me një nen tjetër, po të Kushtetutës, ku përcaktohet rendi i emërimeve të anëtarëve të Gjykatës Kushtetuese. Sipas këtij neni: "Anëtari i parë për t'u zëvendësuar në Gjykatën Kushtetuese emërohet nga Presidenti i Republikës, i dyti zgjidhet nga Kuvendi dhe i treti emërohet nga Gjykata e Lartë. Kjo radhë ndiqet për të gjitha emërimet që do të bëhen pas hyrjes në fuqi të këtij ligji". Për vakancën e parë presidenti ka propozuar Besnik Muçin si anëtar i Gjykatës Kushtetuese. Me Marsida Xhaferllarin dhe Arta Vorpsin për të njëjtën vakancë, Gjykata Kushtetuese shkon në 5 anëtarë. Elsa Toska dhe Fiona Papajorgji të zgjedhur nga parlamenti janë pritje të thirrjes së Presidentit për të bërë betimin dhe për të nisur zyrtarisht punën si gjyqtarë në Kushtetuese.
AKUZAT
Me një gjuhë të ashpër ndaj kreut të Këshillit të Emërimeve në Drejtësi, Ardian Dvorani, Meta bëri të qartë se nuk ka asnjë afat kushtetues ndaj presidentit për të përzgjedhur anëtar në mesin e kandidatëve për Gjykatën Kushtetuese, që KED i ka radhitur sipas një pikëzimi. Presidenti Ilir Meta e cilësoi kryetarin e KED- së Ardian Dvorani mafioz. "Kryetari i KED lojëra me karakter administrativ në mënyrë mafioze, që të vendosë presidentin në këtë pozitë, kreun e shtetit, që të shkelë Kushtetutën. Kjo është e turpshme, është mafioze. Gjatë gjithë këtij procesi me KEDnë kemi qenë në një marrëdhënie institucionale. Këto lojëra dhe filma nuk ka mbetur njeri dhe budalla pa i kuptuar përveç të korruptuarve shqiptarë dhe ndërkombëtarë", theksoi z. Meta. Presidenti i kërkoi kohë KEDsë pas zgjedhjes së anëtarit të parë, Besnik Muçit, në mënyrë që radha për anëtarin e dytë t'i kalonte Parlamentit. Por KED duke thënë se kaloi afati ligjor 30 ditor që presidenti duhej të kishte zgjedhur anëtarin e tyre, zgjodhi automatikisht Arta Vorpsin në Kushtetuese, e cila ishte e radhitur e para në sistemin e pikëzimit. Meta deklaroi se afatet ligjore janë të caktuara vetëm për parlamentin, por jo për presidentin. Në këtë situatë, presidenti foli për individë të caktuar të mazhorancës që kanë keqpërdorur edhe kreun e një institucioni kolegjial: "sipas fakteve dhe të gjitha provave në mënyrë që presidenti të vihej në këtë pozitë, ose të bënte një veprim që do të anatemohej si shkelje e kushtetutës, të caktonte edhe të parën edhe të tretën menjëherë, dhe të thuhej që nuk ta lejon Kushtetuta, ose t'i bëhej një interpretim përmes marrëzirave të tilla".
PARALAJMËRIMI
Presidenti Ilir Meta përmendi se në vazhdimësi e ka paralajmëruar KED- në për mënyrën se si po e menaxhon procesin, pasi solli lista me emra të paktë, 3 deri në 4 emra të ngjashëm për vende të ndryshme bosh në Kushtetuese. Kreu i shtetit tha se ky është një proces i caktuar dhe i përzgjedhur. "E kam paralajmëruar KED, që si po e menaxhon procesin ishte e gabuar, se nuk janë të paktë kandidatët që janë skualifikuar duke përdorur standarde të dyfishta",- u shpreh presidenti. Sipas Metës duhej ndjekur një radhë që një anëtar të zgjidhej prej tij, një prej parlamentit, dhe më tej tjetri nga Meta, dhe i dyti sërish nga Kuvendi, për ta çuar në total në 4 numrin e anëtarëve të zgjedhur në këtë fazë. Këtë, Meta theksoi se e bëri për t'i dhënë mundësi Kuvendit që të ishte brenda afateve ligjore, 30 ditore, deri në zgjedhjen e anëtarit të dytë në mesin e kandidatëve. "Por ata i bënë të dyja njëherazi, kjo është përgjegjësi e tyre", theksoi z. Meta. Presidenti Ilir Meta theksoi se parlamenti e shtyu qëllimisht në kohë vetëm dy ditë para se t'i mbaronte afati, për t'i zgjedhur të dyja vakancat në një seancë plenare.
ARGUMENTET
Presidenti Ilir Meta, përmes konferencës për mediat sqaroi mbrëmë vendimin për dekretimin e Marsida Xhaferllari, si anëtare e Gjykatës Kushtetuese. "Duhet të kemi të qartë ju dhe çdo qytetar se nuk ka një afat të caktuar në Kushtetutë për Presidentin, ka afat për parlamentin, për arsye se është një institucion kolegjial që përbëhet edhe nga forca të ndryshme politike, por jo për Presidentin. E dyta, që duhet të jetë e qartë për çdo shqiptar, Kushtetuta është mbi çdo gjë, aq më tepër kur bëhet fjalë për krijimin e gjykatës Kushtetuese. Kushtetuta është zero, letër pa Gjykatën Kushtetuese. Momenti i krijimit të gjykatës është historik, sepse për herë të parë krijohet gjykata sipas reformës që u bë në kushtetutë për reformën në drejtësi dhe është e rëndësishme që të respektohet kushtetuta aq më tepër për gjykatën, pasi është garancia për mbrojtjen e popullit shqiptar. Çdo akt në këtë proces është historik sepse do të mbetet si një referencë në të ardhmen, çdo veprim i presidentit aktual është një veprim që mbetet si precedent, apo çdo veprim i kuvendi është precedent. KED është një institucion që merret vetëm me menaxhimin administrativ dhe asgjë tjetër. Pra, Kushtetuta tregon si krijohet gjykata, Presidenti ka të drejtën për vakancën e parë, pastaj është parlamenti dhe në këtë mënyrë përsëritet e njëjta renditje dhe në këtë plan është detyra e KED- së që të rregullojë listat e vakancave dhe të afateve, që të respektohet Kushtetuta për mënyrën e ndërtimit të gjykatës dhe të mos kemi përplasje", u shpreh z. Meta.