I shtruar në spital prej dy ditësh, humb jetën në rrethana të dyshimta 58- vjeçari
Pas ngjarjes, reagon spitali Korçës: Pacienti kishte gur në tëmth Vëllai i të ndjerit: I dhimbte koka dhe barku, doktori nuk na dha diagnozë, i bënin vetëm serume
Një 58- vjeçar ka ndër ruar jetë mëngjesin e djeshëm në Korçë, në rrethana të dyshimta. Bëhet fjalë për Telha Kelon nga fshati Pojan, i cili vdiq për shkaqe, të cilat ende nuk dihen ose të paktën familjarët pretendojnë kështu. Babai i dy fëmijëve ka qenë i shtruar në spitalin e Korçës para tri ditëve nga ku mjekët nuk kanë hasur ndonjë problem përveçse dhimbje koke dhe barku. Familjarët deklaruan se 58- vjeçari po kurohej prej dy ditësh nga tëmthi, ndërkohë që kanë kërkuar ta transferojnë në spitalin e Tiranës. Ata kanë pretenduar se 58vjeçari ka marrë mjekim të gabuar përgjatë dy ditëve që ka qëndruar në spital. Trupi i Telha Kelos është dërguar në morg që prej orës 08: 00 nga ku pritet të kryhet ekspertiza mjekoligjore. Ndërkohë me këtë çështje po merren oficerët e Policisë Gjyqësore të Prokurorisë Korçë. Pas ngjarjes ka reaguar vëllai i viktimës, i cili tha dje për "Gazeta Shqiptare" se e kishin sjellë me dhimbje koke dhe prej dy ditësh bënte serume. Ai pretendon se u kanë kërkuar mjekëve ta transportojnë në Tiranë, por ata nuk kanë pranuar dhe nuk kanë dhënë asnjë diagnozë. "I dhimbte koka. E solli byrazeri me makinën e tij pardje, sot në mëngjes mbaroi. Fjalët e mjekut janë nga dhimbja e kokës vdes njeri. Nuk ka vuajtur nga ndonjë sëmundje më parë. Nuk e dimë me çfarë e kanë mjekuar, serume i bënin. Do bëhet më mirë na thanë mjekët. U kemi kërkuar që ta çonim në Tiranë, na thanë që nuk e kemi nxjerrë ende diagnozën që ta dërgojmë në Tiranë. Sot kur erdhëm në orën 8: 00 e morëm vesh. Nuk e di çfarë diagnoze do i vërë doktori që të shpëtojnë. E tërë nga doktori ka ardhur, se po të kishte nxjerrë doktori diagnozën, do të ishin marrë masat", deklaroi vëllai i viktimës. Ndërkohë, të kontaktuar nga "GSH", burime nga spitali thanë se çështja ka kaluar në OPGJ në prokurori dhe nuk prononcohen. "Familjarët mund të pretendojnë çfarë të duan, rasti i tij ka ardhur në urgjencë dhe më pas në kirurgji, është parë nga 10 mjekë si rast", thanë burime nga spitali.
REAGIMI I SPITALIT
Spitali Rajonal i Korçës ka mohuar akuzat se shkak për vdekjen e Telha Kelos ka qenë mjekimi i gabuar nga ana e bluzave të bardha. Në reagimin zyrtar të mjekëve të spitalit thuhet se pacienti vuante nga kolecistit kalkuloz, ose gur në tëmth. Gjendja e pacientit njofton spitali është rënduar mëngjesin e sotëm, ku fatkeqësish ndërroi jetë. "Drejtoria e Shërbimit të Spitalit Rajonal Korçë u shpreh ngushëllimet familjarëve të T. K., duke sqaruar opinionin publik si më poshtë: Pacienti T. K. është paraqitur përpara dy ditësh në spital me ankesë dhimbje të kokës, menjëherë është kryer ekzaminimi i plotë duke përfshirë analiza laboratorike, EKG, eko abdominale, CT koke me kontrast etj. Pas kryerjes së ekzamimimeve, pacienti ka rezultuar me kolecistit kalkuloz. Pas kësaj pacienti është shtruar në kirurgji. Gjendja e tij është rënduar mëngjesin e sotëm dhe pacienti është dërguar menjëherë në reanimacion dhe për rreth dy orë është trajtuar nga reanimatori. Spitali Rajonal Korçë sqaron se bazuar në protokollet e mjekimit, pacientit i është dhënë ndihma maksimale nga personeli. Jemi në pritje të autopsisë. Drejtoria e Shërbimit të Spitalit Rajonal Korçë", shkruhet në njoftimin zyrtar të spitalit.