Rudina Hajdari: Meta dhe Rama të ndalin sulmet kundër drejtësisë

Krahas

krerëve të partive parlamentare që u larguan nga Kuvendi, kreu i shtetit duket se ka nisur një seri takimesh edhe me deputetë të opozitës në Kuvend. Dhe takimin e parë ka zgjedhur ta bëjë me kryetaren e grupit parlamentar "demokrat", Rudina Hajdari. Nuk dihet me saktësi nëse ka qenë një takim i thirrur nga Presidenti apo një takim i kërkuar nga Hajdari, pasi ka qenë kjo e fundit që ka bërë të ditur takimin me Metën. Nëpërmjet një deklarate

Rudina Hajdari ka zbardhur bisedën e zhvilluar me presidentin, duke theksuar se i kishte kërkuar urgjentisht që të ndalet lufta e shëmtuar politike kundër institucioneve në drejtësi. "I kërkova kryetarit të shtetit,

Presidentit të Republikës dhe në vazhdim do ia kërkoj edhe kryeministrit e të gjithë faktorëve politikë që të ndalin urgjentisht lojën e vjetër dhe të shëmtuar politike, e cila ka vënë në shënjestër institucionet e drejtësisë me qëllim delegjitimimin e tyre. Për 29 vite me radhë, kjo klasë politike i ka dobësuar e delegjitimuar qëllimisht institucionet, në mënyrë që i vetmi autoritet në vend të ishin kryetarët e dy apo tri partive. Prandaj për 29 vite Shqipëria ka parë shumë krim dhe aspak ndëshkim", - shkroi Hajdari. Më tej ajo thekson se kjo situatë duhet të marrë fund dhe vendin ta qeverisin institucionet e forta dhe Kushtetuta. "Ka ardhur koha që kjo të marrë fund. Vendi, sot më shumë se kurrë, ka nevojë jo për burra që hiqen si të fortë para kamerave, por për institucione të forta, të cilat japin drejtësi për të gjithë, të varfër apo të pasur, me apo pa pushtet. Ka ardhur koha që vendin ta qeverisin institucionet, ligji dhe kushtetuta", - nënvizoi Hajdari.