ATP: 350 pronarët që marrin 229 milionë lekë
Agjencia: 6 dokumentet që duhet të dorëzoni nga 28 janari
Agjencia e Trajtimit të Pronave çel proce durat për kompensimin e 350 pronarëve që u është zënë toka nga ndërtimet pa leje. Dokumentet pranohen nga 28 janari i këtij viti. Sipërfaqja e përgjithshme që kompensohet është 26 mijë e 416 metra katrorë dhe vlera e kompensimit financiar është 229 milionë e 260 mijë lekë. "Agjencia e Trajtimit të Pronave njofton fillimin e procesit të pranimit të kërkesave për kompensimin e pronarëve të pasurive të paluajtshme, që preken nga ndërtimet informale, gjeneralitetet dhe të dhënat e të cilëve janë sipas VKM- së nr. 15, datë 15.01.2020. Procesi i pranimit të kërkesave të subjekteve përfituesve do të fillojë në datën 28.01.2020 dhe nuk do të jetë i kushtëzuar dhe i kufizuar në kohë", - thuhet në njoftim. ATP- ja fton të gjitha subjektet e interesuara të paraqiten pranë zyrave të saj, në adresën rruga "Muhamet Gjollesha", nr. 54, Tiranë, çdo ditë nga e hëna në të premte, për plotësimin e kërkesës për kompensim dhe dorëzimin e dokumenteve përkatëse.
PROCEDURAT
Procedura e aplikimit nga subjektet përfituese është e thjeshtë. Bazuar në VKM- në nr. 383 datë 19.05.2010 "Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private që preken nga ndërtimet informale", i ndryshuar, subjektet përfituese mund të paraqesin kërkesë individuale apo të përbashkët për pjesën takuese në pronën që kompensohet. Nëse kërkesa paraqitet nga një pjesë e bashkëpronarëve, ajo shoqërohet nga prokura e posaçme e nënshkruar prej tyre, ku si tagër i nevojshëm të jetë edhe e drejta për të tërhequr vlerën financiare në emër të tyre. Në rastin e kërkesave individuale të secilit bashkëpronar apo të një pjese të tyre, për çdo aplikim të kryer paguhet tarifë shërbimi, pavarësisht se i përket të njëjtës pasuri të paluajtshme.