Ilir Meta vizitë në Izrael, takim me presidentin Rivlin
Forumi për Ditën e Kujtesës së Holokaustit, "blindohet" Izraeli "Kënaqësi të jem i pari president që viziton Shqipërinë"
Në ditën e parë të viz itës së tij zyrtare në Izrael, Presidenti i Republikës, Ilir Meta, u prit në një takim të veçantë nga Presidenti i Izraelit, Reuven Rivlin. Presidenti Meta e falënderoi homologun izraelit për ftesën për të marrë pjesë në Forumin Ndërkombëtar të Liderëve, për të përkujtuar Ditën e Kujtesës së Holokaustit dhe 75- vjetorin e Çlirimit të kampit të Aushvitz- Birkenau. "Ndihem krenar që jam kreu i një shteti, ku antisemitizmi jo vetëm nuk ka ekzistuar kurrë, por edhe i një vendi ku numri i hebrenjve jo vetëm u shumëfishua gjatë Luftës së Dytë Botërore, por asnjë prej tyre nuk iu dorëzua pushtuesve", - vuri në dukje kreu i shtetit shqiptar. Ndërsa Presidenti Rivlin nënvizoi se, "shembulli i popullit shqiptar për shpëtimin e hebrenjve përbën një model unik për të gjithë botën". Gjithashtu, Presidenti Meta vuri në dukje faktin se Shqipëria dhe Izraeli gëzojnë marrëdhënie të shkëlqyera dhe se të dyja vendet e popujt tanë ndajnë të njëjtat vlera të lirisë dhe demokracisë. "Ne do të jemi bashkë edhe në përpjekjet për t'i mbrojtur këto vlera nga kërcënimet e përbashkëta si terrorizmi, ekstremizmi i dhunshëm dhe fundamentalizmi fetar", - nënvizoi kreu i shtetit. Presidenti Meta inkurajoi rritjen e investimeve izraelite në vendin tonë. "Shqipëria ka shumë për të mësuar nga Izraeli rreth përdorimit të teknologjisë, për të nxitur zhvillimin ekonomik. Në të njëjtën kohë, edhe ne kemi shumë për t'iu ofruar investitorëve dhe turistëve izraelitë, që duan të vizitojnë vijën tonë të mrekullueshme të bregdetit, malet tona të larta dhe vendet historike", - theksoi Presidenti Meta. Kreu i shtetit e falënderoi homologun izraelit për mesazhet e solidaritetit pas tërmetit të 26 nëntorit të vitit të kaluar në Shqipëri, vlerësoi operacionet e kërkim- shpëtimit izraelite që erdhën menjëherë pas tërmetit, si edhe punën e grupeve të specializuara për vlerësimin e ndërtesave të dëmtuara. "Ne jemi thellësisht mirënjohës për mbështetjen mbresëlënëse të Izraelit gjatë atyre ditëve", - u shpreh kreu i shtetit. Presidenti Meta e ftoi Presidentin Rivlin për një vizitë në Shqipëri, ftesë që u mirëprit me kënaqësi. "Do të jetë kënaqësia ime të jem Presidenti i parë i Izraelit që viziton vendin tuaj aq mikpritës për ne", u shpreh Rivlin. Në forumin që po mbahet në Izrael priten 47 delegacione të liderëve botërorë, përfshirë 26 presidentë, katër mbretër dhe katër kryeministra, midis tyre edhe Presidenti i Shqipërisë, Ilir Meta. Një forcë sigurie prej gati 10,000 personash do të mbrojë liderët botërorë dhe të tjerët që marrin pjesë në Forumin e 5- të të Holokaustit në Yad Vashem në Jerusalem të enjten. Operacioni "E ardhmja", i cili po udhëhiqet nga Policia e Izraelit u përshkrua në një deklaratë të policisë si një "operacion kompleks dhe i integruar kombëtar". Përveç 6.300 oficerëve të policisë, siguria e dinjitarëve vizitues do të mbikëqyret nga mijëra oficerë të tjerë nga Policia Kufitare, njësitë e fshehtë, njësitë speciale të patrullimit dhe njësitë e terrorizmit.