Meta takohet në Jerusalem me përfaqësues të bashkësisë izraelito- shqiptare
Presidenti, apel studentëve: Mësoni të vërtetat historike
Në
kuadër të pjesëmarrjes në Forumin e 5- të Botëror për Holokaustin, Presidenti Ilir Meta takoi përfaqësues të bashkësisë izraelito- shqiptare, që jeton dhe punon prej dekadash në Izrael. Presidenti Meta i falënderoi për kontributin e tyre të shkëlqyer për forcimin e marrëdhënieve midis dy vendeve dhe popujve tanë. Kreu i shtetit e vlerësoi si një hap të rëndësishëm në këtë drejtim edhe përkushtimin maksimal të bashkësisë izraelito- shqiptare për ngritjen në Vlorë të Muzeut të Historisë Hebraike. "Shumë i lumtur nga takimi i ngrohtë dhe i përzemërt në Jerusalem me përfaqësues të bashkësisë izraelito- shqiptare, që jetojnë dhe punojnë prej dekadash në Izrael. I falënderova për kontributin e tyre të shkëlqyer për forcimin e marrëdhënieve midis dy vendeve dhe popujve tanë", - shkruan Meta. Me herët, presidenti takoi studentët e shkollës prestigjioze "Lauder" të qeverisjes, diplomacisë dhe strategjisë në Izrael. Ai përcolli mesazhin: "Brezat e rinj në vendet e rajonit duhet të mësojnë të vërtetat historike për të mos lejuar që të ndodhin kurrë më tragjedi, si ato që kemi përjetuar pak dekada më pare". Meta mbajti një ligjëratë të veçantë me temë: "Shembulli unik i Shqipërisë në shpëtimin e hebrenjve gjatë Luftës së Dytë Botërore dhe bashkëjetesa fetare në Shqipëri si model i paqes. Toleranca, bashkëjetesa etnike, fetare dhe kulturore në Ballkan është thelbësore për ta çuar edhe më përpara paqen, stabilitetin dhe harmoninë rajonale, për promovimin e të cilave Shqipëria ndihet krenare që ka pasur një rol kryesor", u shpreh Meta.