I njëjti gjyqtar mbylli "lobimin rus", pushon çështjen e CEZ: Nuk u gjetën elemente të veprës penale
Reagon Balla: Gjyqtar "KÇK", do ankimohet menjëherë
TIRANË - Gjykata e Tiranës ka pranuar kërkesën e prokurorisë për pushimin e çështjes CEZ. Vendimi u mor ditën e djeshme nga gjykatësi Lazër Sallaku, i cili vendosi pak ditë më parë mbylljen e çështjes së lobimit rus për PD si dhe lirimin për 6 të dyshuarit e dosjes "Toyota Yaris". Kjo përderisa hetimet gati 3vjeçare nuk dhanë rezultat, pasi nuk u gjendën elementë të veprave penale për ish- zyrtarët. Hetimet për procedurën e privatizimit të OSSH nga çekët e CEZ në 2007, e cila u konsiderua korruptive, nisën kohë më parë dhe në pyetje u morën një numër i lartë zyrtarësh, përfshirë edhe Shkëlzen Berishën, djalin e ish- kryeministrit Berisha. Për këtë çështje u ngrit edhe një komision hetimor parlamentar i drejtuar nga Taulant Balla, i cili në finale të tij arriti në konkluzionin se nga procedura e privatizimit të shtetit i ishte shkaktuar një dëm prej 414 milionë eurosh. Mbi këtë konkluzion, gjykata rrëzoi prokurorinë dhe ktheu çështjen për rihetim, duke i lënë detyra shtesë për të përmbushur, siç ishte ndër të tjera pyetja e Shkëlzen Berishës, ishministrit të Ekonomisë, Genc Ruli dhe biznesmenit Nue Kalaj. Me këtë vendim, dosja CEZ konsiderohet e mbyllur. Pasi gjykata e Tiranës vendosi që të mbyllë hetimet për çështjen e "CEZ", me pretendimin se nuk ka vepër penale, vjen një reagim nga kreu i grupit të Partisë Socialiste, Taulant Balla. Përmes një mesazhi në ' Facebook, Balla ka sulmuar ashpër gjyqtarin e çështjes, Lazër Sallaku, duke e futur në grupin e ' KÇK'- së, ' Kap Ça të kapësh', i njëjti që pushoi edhe akuzat ndaj kreut të PD- së Lulzim Basha për çështjen e falsifikimit të dokumentave. Balla njoftoi se do të ankimojë vendimin në fjalë, gjetje që sipas tij më pas do t'i çohen SPAK- ut. Sipas Ballës, ' ÇEZ' është një ndër dosjet më të rënda të korrupsionit në Shqipëri dhe se çdo përpjekje për mbylljen e saj, bie ndesh me pritshmëritë e shqiptarëve dhe të partnerëve të Shqipërisë për hetimin e dinosaurëve të korrupsionit. Po ashtu Balla ka publikuar një pjesë të raportit të Komisionit Hetimor për këtë çështje.