Prokuroria e Posaçme merr videon origjinale, thërret sërish në pyetje kryebashkiakun e Bulqizës
Balla: Nëse vërtetohet akuza, reagimi do jetë i ashpër, PS nuk bëhet mburojë për askënd SPAK i kërkon Lefter Allës të bëjë testin e drogës: Dorëzo kampion gjaku dhe urine në laborator
Prokuroria e Posaçme ( SPAK) ka thirrur dje sërish kryebashkiakun e Bulqizës, Lefter Allën, për ta marrë në pyetje, lidhur me videon e publikuar, ku shfaqej duke thithur kokainë. SPAK bëri të ditur se ka nisur një hetim në lidhje me videon e publikuar në media nga gazetari Artan Hoxha, ku pretendohej se kryebashkiaku i Bulqizës, Lefter Alla, konsumonte kokainë. Sipas burimeve zyrtare nga Prokuroria e Posaçme, verifikimet janë duke u kryer në bazë të nenin 283 të Kodit Penal, "për shitje, ofrim, dhënie, marrje si dhe mbajtje të substancave narkotike". Procedimi penal është duke u hetuar nga prokurori Ened Nakuçi, i cili gjatë ditës së djeshme thirri për t'i marrë dëshmitë gazetarit Artan Hoxha dhe më pas kryebashkiakun Alla. Më herët, oficerët e Policisë Gjyqësore kishin sekuestruar edhe videon e publikuar, pas nisjes kryesisht të hetimit. Në ditët në vijim, prokuroria do të kryejë një akt ekspertimi për videon, për të parë nëse ka ndërhyrje në të, ndërsa burimet bënë të ditur se është bërë edhe një këqyrje në lokalin ku dyshohet se ka ndodhur ngjarja. Ndërkaq, burime për "Shqiptarja. com" pohuan se Prokuroria e Posaçme Kundër Korrupsionit dhe Krimit të Organizuar i ka kërkuar kryebashkiakut të Bulqizës, Lefyer Alla që t'i nënshtrohet testit të drogës pas publikimit të videos, ku PD- ja pretendon se është ai që merr kokainë. Për të kryer këtë procedurë, Alla duhet të paraqitet e Institutin e Mjekësisë Ligjore, për t'i marrë kampion gjaku dhe urine, me qëllim kryerjen e ekspertimit mjeko- ligjor, që do të vërtetojë nëse Alla është konsumues droge ose jo. Kjo ekspertizë do të jetë baza e kësaj çështjeje penale dhe që mund të shtyjë prokurorët të ngrenë akuzë për kryebashkiakun e Bulqizës, Lefter Alla. Po të njëjtat burime sqaruan se vetëm 24 orë pas çeljes së këtij hetimi, prokurorët e çështjes kanë kërkuar ekspertimin grafik të videos tashmë të sekuestruar. Ekspertimi do kryhet nga ekspertët e laboratorit të Policisë Shkencore në Ministrinë e Brendshme. Nëpërmjet kësaj ekspertize prokuroria synon të provojë qartësisht dhe me anën e një ekspertize nëse personi që shfaqet me shpinë në video, është ose jo Lefter Alla. Kryebashkiaku i Bulqizës dëshmoi në Strukturën e Posaçme Antikorrupsion edhe mbrëmjen e së enjtes ( SPAK) pas akuzave të Partisë Demokratike se shfaqet në një video duke pirë kokainë. Jashtë dyerve të SPAK, ku qëndroi për rreth një orë Alla refuzoi të jepte një deklaratë duke shprehur se tashmë kjo çështje i takon drejtësisë, "E ka në dorë drejtësia". Në një postim në rrjetet sociale, Alla deklaroi: "Dua të sqaroj se ekzistenca e një videomontazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë. Kushdo që më akuzon mua, të presë veprimet e prokurorisë dhe vendimin përkatës të gjykatës", - thotë Alla. Partia Socialiste është distancuar nga Alla duke e cilësuar si përgjegjësi personale nga kryebashkiaku. Ndërkaq, në lidhje me videon e publikuar për kryebashkiakun Lefter Alla, ka reaguar dje sekretari i përgjithshëm i PS, Taulant Balla për kreun e Bashkisë Bulqizë, Lefter Alla.
REAGIMI I BALLËS
Balla tha se PS- ja nuk është bërë dhe s'ka për t'u bërë mburojë për askënd, por do të pritet vendimi i drejtësisë, ndërsa paralajmëroi dënim maksimal, nëse vërtetohet se z. Alla është duke konsumuar kokainë në video. "Prej 18 dhjetorit 2019 kur ka nisur punën SPAK, subjekt i së cilës janë nga presidenti përfshi deputetët, duhet të kuptojmë të gjithë që duhet të pranojmë një standard tjetër nga ai që është sot. Asnjëherë më parë nuk ka pasur hetim kaq shpejt. Përshëndes SPAK për nisjen e hetimit, në asnjë rast PS nuk ka marrë e nuk ka për të marrë kurrë në mbrojtje askënd. Nuk i di pistat që po heton prokuroria, por dua ta mbështes atë dhe mezi presim që sapo të ketë akuza të caktuara reagimi ynë do jetë i ashpër. Sikurse çdo qytetar ndjejmë neveri nëse vërtetohet, por po ashtu ndjejmë neveri kur parti të caktuara përdorin videomontazhe për të dëmtuar krahun tjetër. Ia lemë prokurorisë, në rast se vërteton çdo lloj akuze, dënimi do jetë maksimal për këdo", tha Balla. Ndërsa theksoi se nuk i kthen asnjë përgjigje PD- së, por vetëm rasteve që drejtohen nga institucionet e drejtësisë. "Ju kujtoj akuzat për kreun e Bashkisë së Vaun të Dejës, po bën 6 muaj dhe nuk di të jetë konfirmuar një rast i tillë. Me rëndësi është që Shqipëria ka instrumentet e plota ligjore për t'u shkuar këtyre rasteve deri në fund. Përshëndes reagimet e menjëhershme për hetime. Më në fund nuk mbyllen çështjet vetëm në nivel të akuzave politike", vijoi më tej Balla.
BESNIK MUSTAFAJ
Ish- ministri i Jashtëm i Shqipërisë, Besnik Mustafaj në një intervistë për rubrikën “Opinion” në “News 24” foli ndër të tjera edhe për videon ku dyshohet se kryebashkiaku i Bulqizës Lefter Alla konsumon kokainë. Mustafaj tha dje se Rama vazhdon të zgjedhë njerëz të inkriminuar sepse i shërbejnë atij, ndërsa shtoi se SPAK nuk duhet të hetojë vetëm këtë rast, por edhe koncesionet korruptive të qeverisë.