Paketa kundër koronavirusit, Basha: Të fshihen faturat e ujit dhe dritave
Kreu i PD: Aparatura të reja për analizat që nxjerrin përgjigjen për 45 minuta "Hapni thesarin, fondi prej 3.5 mln dollarë, i pamjaftueshëm"
Lideri i opozitës Lulzim Basha propozoi disa masa për të parandaluar përhapjen e koronavirusit në territorin shqiptar mes të cilave edhe rishikimin e buxhetit 2020 dhe alokimimi i fondeve për shëndetësinë. Madje kreu i PD kërkoi hapjen e thesarit të shtetit. Në listën e 6 masave kryesore, Basha nënvizon pezullimin e pagesës së ujit dhe energjisë elektrike për zonat e prekura si dhe pezullimin e kontributin e sigurimeve shoqërore. Gjithashtu, kreu i opozitës propozon rishikimin e buxhetit për vitin 2020, ndërsa kërkon edhe nga bankat që riplanifikojnë pagesat për kreditë familjare dhe për biznesin. Lulzim Basha kërkoi nga qeveria më shumë fonde për të blerë pajisje më moderne që shkurtojnë periudhën për analizimin e koronavirusit deri në 45 minuta. Gjatë një bashkëbisedimi me gazetarët, Basha propozon që faturat e ujit, si dhe kamatvonesat duhet të pezullohen për disa muaj në ato zona ku rastet me koronavirus janë më të larta. Ai kërkoi nga qeveria, gjithashtu, që të rishikojë buxhetin 2020 dhe atribuimin e fondeve për shëndetësinë. "Duhet të fokusohemi në dy komponentë kryesorë. Te komponenti i kujdesit për shëndetin dhe te komponenti që vendi të mos kalojë në kolaps total ekonomik. Grupi i punës dhe i ekspertëve në PD, konsultuar edhe me ekspertë, propozojmë këto masa: 1. Pezullimin dhe fshirjen e faturave të ujit në zonat ku virusi është shfaqur. 2. Të ndalohet shkëputja e ujit dhe dritave deri në tejkalimin e gjendjes. 3. Të pezullohen kontributeve shëndetësore për 3 muaj. 4. Përjashtimi nga tatim fitimi për të gjitha subjektet ku është shfaqur virusi, 2 muaj kosto të pagave të punonjësve. 5. Përjashtim nga taksa e pronës për tre muaj. 6. Përjashtim nga kamatëvonesat dhe gjobat për 3 muaj. 7. Mbështetje për sektorin e turizmit, fason apo call center. 8. Kërkojmë rishikimin e buxhetit për përballimin e kostove të të sëmurëve. 9. Alokimin e fondeve për testimin e personave të prekur. 10. Rritjen e fondeve për shërbimet sociale. Propozimet të studiohen me përparësi, nuk kam asnjë merak, le ta marrë meritën si për prindin që të rrijë në shtëpi.
Nuk ka rëndësi, nuk i propozoi i pari, e rëndësishme është t'i thërrasin mendjes. Mos rrijë në Twitter, por të bëjnë punën sikur duhet dhe jo të merren me opozitën."
FONDI
Kreu i Partisë Demokratike, Lulzim Basha i bëri thirrje qeverisë për të siguruar pajisje dhe aparatura të nevojshme për stafet mjekësore. Lideri demokrat theksoi që mjekët duhet të mbrohen, pasi nëse infektohen ata, nuk ka kush kujdeset për qytetarët. Sipas tij, qeveria duhet të akordojë më shumë fonde për blerjen e pajisjeve të duhura për ekzaminimin e qytetarëve bartës të virusit. Basha kërkoi të merren pajisje që shkurtojnë kohën e analizës së COVID- 19 nga disa orë në 45 minuta. "Humbja e jetës së të moshuarës është një lajm i keq edhe për rrethanat në të cilat është trajtuar. Duhet të rrisim të gjithë kujdesin. Kjo është thirrja ime e parë për çdo bashkëqytetar. Këshilla ime për personelin mjekësor është të ndiqet me rigorozitet protokolli i masave mbrojtëse për të mbrojtur veten dhe të afërmit. Thirrja për qeverinë është të sigurojë pajisjet dhe aparaturat e nevojshme për stafet mjekësore. Nëse nuk mbrojmë dot mjekët, nuk mbrojmë dot qytetarët. Nëse ata infektohen, nuk ka kush kujdeset për qytetarët. I bëj thirrje qeverisë të akordojë fondet për blerjen e pajisjeve të duhura për ekzaminim e qytetarëve bartës të virisit. Të merren pajisjet që shkurtojnë kohën e analizës së COVID 19 nga disa orë në 45 minuta. Kjo ndihmon në parandalimin e përhapjes dhe trajtimin e bartësve të virusit. 3.5 milionë usd nuk mjafton. Aktet e vetëdijësimit apo më keq, propaganda, nuk zgjidhin situatën", - deklaroi z. Basha. Sipas tij mungesa e transparencës të punës së qeverisjes, është një armik vdekjeprurës. "Opozita ka për detyrë që t'i bëjë thirrje qeverisë që të bëjë transparencën. Opozita është kundër hapjes së panikut, patjetër, por do bëjë transparencë me popullin shqiptar. Mungesa e transparencës është një armik vdekjeprurës. Duhen më shumë shërbime ndaj njerëzve. Ne bëjmë rolin tonë si opozitë. Ekspertët tanë kanë kaq ditë që apelojnë për marrje masash. Ata janë qeveria, ata kanë paratë, ata kanë në dorë situatën e mos vazhdojnë me propagandën bajate",- theksoi z. Basha.