Koronavirusi, 4 të moshuar luajnë domino, ndërhyn policia. Balla: Kjo është kohë lufte

Pavarësisht

thirrjeve të vazhdueshme për të treguar kujdes dhe për të mos u treguar indiferentë ndaj masave që duhen zbatuar për të parandalur përhapjen e koronavirusit, shumë qytetarë zgjedhin të mos i respektojnë masat e vendosura nga qeveria ditët e fundit. Kreu i grupit parlamentar të PS- së, Taulant Balla ka publikuar foton e katër të moshuarve, teksa luajnë domino në Elbasan. Balla shkruan se nevojitej ndërhyrja e policë bashkiake që të ndërpresin "grumbullimet e dominove në Elbasan". Ai shton se nuk është koha e duhur për t'u argëtuar. "Na u desh të dërgojmë policinë bashkiake të ndërpresim grumbullimet e dominove në Elbasan. Kjo nuk është kohë argëtimesh jashtë shtëpisë, po kohë lufte dhe kjo luftë fitohet vetëm duke kufizuar lirinë tënde, duke ndryshuar rrënjësisht mënyrën e jetesës dhe duke ruajtur familjen tënde nga kontaktet e tua me jashtë! frikë aspak, kujdes po! Madje shumë fare!", - shprehet z. Balla.