Koronavirusi, Meta me kreun e OBSH: S` ka vend për panik, duhet kujdes
Presidenti takon mjekët: Të përfshihen kapacitetet jashtë shërbimit aktiv shëndetësor "Kujdes maksimal, të zbatohen këshillat e autoriteteve"
Presidenti Ilir Meta pri ti dje në zyrën e tij Drejtorin e Zyrës së Organizatës Botërore të Shëndetësisë në Tiranë Raul Gonzales, me të cilin bisedoi për masat e marra për mbrojtjen nga koronavirusi. Sipas njoftimit të presidentit, nuk ka vend për panik, por duhet kujdes maksimal nga të gjithë qytetarët. "Një bisedë konstruktive me Drejtorin e Zyrës së Organizatës Botërore të Shëndetësisë në Tiranë, Dr. Raul Gonzalez, lidhur me masat mbrojtëse të marra nga institucionet tona shtetërore për përballimin me pasoja sa më të lehta të coronavirusit. Nuk ka vend për panik, por kujdesi duhet të jetë maksimal nga çdo qytetar! Është i domosdoshëm zbatimi me rigorozitet i protokollove shëndetësore dhe i këshillave të stafeve mjekësore nga të gjithë! Së bashku për të mbrojtur shëndetin e çdo qytetari!", - deklaroi z. Meta.
TAKIMI
Presidenti i Republikës, Ilir Meta priti dje katër personalitete të shquara të shëndetësisë shqiptare, me të cilët ka ndarë disa shqetësime për situatën e shkaktuar si pasojë e përhapjes në vendin tonë të COVID_ 19, si dhe për marrjen e të gjitha masave të domosdoshme për të mos lejuar përshkallëzimin. "Profesor Isuf Kalo, mjeku i parë shqiptar në stafin permanent të Organizatës Botërore të Shëndetësisë në Kopenhagen, mjekët e nderuar dhe me një eksperiencë të jashtëzakonshme në sistemin shëndetësor, Fedhon Meksi dhe Andrea Gudha, si edhe ish- ministri i Shëndetësisë,
Tritan Shehu më njohën me pikëpamjet e tyre shumë të vyera për tejkalimin me pasoja sa më të lehta të kësaj situate të vështirë, që në vlerësimin e përbashkët kërkon përgjegjshmëri maksimale, bashkëpunim të ngushtë dhe transparencë",shprehet Presidenti Meta. Sipas presidentit, ata vlerësuan punën e jashtëzakonshme të të gjithëve mjekëve, infermierëve, sanitarëve dhe personelit mbështetës që janë duke shërbyer me profesionalizëm dhe përkushtim maksimal. Kreu i shtetit thekson se përfshirja e kapaciteteve të çmuara njerëzore e shkencore, edhe jashtë shërbimit aktiv shëndetësor, është hap vendimtar për suksesin e tejkalimit të kësaj sfide madhore. "Thirrja jonë për çdo qytetar është të tregojë kujdes maksimal dhe të zbatojë me rigorozitet të gjitha këshillat dhe rekomandimet e autoriteteve! Së bashku për të mbrojtur shëndetin e çdo qytetari!", shkruan Presidenti Ilir Meta. Po dje kreu i shtetit reagoi pas shënimit të viktimës së parë nga koronavirusi në Shqipëri. Me anë të një postimi në "Facebook",
Meta shprehu ngushëllimet për familjarët e të moshuarës. Ai bëri thirrje që të zbatohen në mënyrë rigoroze të gjitha masat dhe këshillat. "Me hidhërim të thellë mora lajmin e ndarjes nga jeta të qytetares 73- vjeçare nga Durrësi të konfirmuar me COVID- 19. Duke u shprehur ngushëllimet më të sinqerta familjes dhe gjithë të afërmve të saj, u shpreh të gjithë solidaritetin tim në këto momente tepër të vështira! Edhe njëherë apeloj me forcë për çdo qytetar të tregojë kujdes maksimal dhe të zbatojë me rigorozitet të gjitha këshillat dhe rekomandimet e autoriteteve!", shprehet z. Meta. 73 vjeçarja që kishte ditë në spitalin e Durrësit ndërroi dje jetë. Ajo ishte prekur nga koronavirusi, por vuante edhe nga sëmundje të tjera kronike.