Pezullimi i udhëtimeve, pasagjerët mund të kërkojnë kompensim
Anulimi i fluturimeve si pasojë e COVID- 19, publikohet manuali për udhëtarët AAC: Ja si duhet të veprojnë pasagjerët dhe kompanitë ajrore
Pasagjerët që kanë humbur fluturimet për shkak të ndërprerjes së linjave me Italinë kanë të drejtën e një itinerari të ri ( një bilete të re të mëvonshme) nga ana e kompanisë OSE dhe kanë të drejtën e rimbursimit të çmimit të plotë të blerjes së biletës nga ana e kompanisë me të cilën kanë prerë biletën. Të drejtat e udhëtarëve janë bërë të ditura nga Autoriteti i Aviacionit Civil, i cili jep edhe udhëzimet për të gjithë pasagjerët që janë prekur nga anulimi i udhëtimeve.
AVIACIONI CIVIL
Autoriteti i Aviacionit Civil ( AAC) informon të gjithë pasagjerët e prekur nga anulimi i fluturimeve, për shkak të masave të marra në kuadër të parandalimit të përhapjes së COVID- 19, se sipas parashikimeve të Udhëzimit Nr. 01, "Për Kompensimin dhe Asistencën e Pasagjerëve në Rastin e Mospranimit në Bord të Avionit dhe Anulimit ose Vonesës Gjatë Fluturimeve" pasagjerët: Kanë të drejtën e një itinerari të ri ( një bilete të re të mëvonshme) nga ana e kompanisë OSE, kanë të drejtën e rimbursimit të çmimit të plotë të blerjes së biletës nga ana e kompanisë me të cilën kanë prerë biletën. "Për të përfituar të drejtën e tyre, në një nga mënyrat e detajuara më sipër, pasagjerët duhet të vendosin kontakt me kompaninë ajrore me email/ telefon",- bën me dije AAC.
KOMPANITË
Në rastet e mos- përgjigjes nga kompania, pasagjerët kanë të drejtë t'i drejtohen Autoritetit të Aviacionit Civil, në cilësinë e autoriteti kompetent për zbatimin e udhëzimit të të drejtave të pasagjerëve. Autoriteti i Aviacionit Civil, pas marrjes së njoftimit ( reklamimit të problematikës me një nga kompanitë) nga pasagjeri, menjëherë do të merren masa të nevojshme për të siguruar respektimin e të drejtave të tyre dhe do të mbajë çdo pasagjer të informuar për statusin e çështjes së tyre. Sipas njoftimit adresa ku duhet të kontaktohet me autoritetin është pax@ acaa. gov. al. AAC i bën thirrje të gjithë qytetarëve të zbatojnë këshillat parandaluese të dhëna nga autoritetet shëndetësore për parandalimin e përhapjes së COVID- 19.
VENDIMI
Ministrja e Transporteve Belinda Balluku kërkoi dy ditë më parë bashkëpunimin e ambasadës italiane në vendin tonë, që, nëse do të ketë kërkesa për të tërhequr italianët që ndodhen në Shqipëri, ta bëjë këtë vetëm përmes avionëve që vijnë bosh në aeroportin e Rinasit. E njëjta gjë do të vlejë edhe për tragetet. Kërkesa erdhi pas vendimit për të ndaluar të gjitha linjat e udhëtarëve me Italinë. Nga përtej Adriatikut nuk do të vijë askush në Shqipëri. Masa u mor pas vendimit të qeverisë së Italisë për të shpallur të gjithë vendin zonë e kuqe, për shkak të përhapjes së koronavirusit, autoritetet shqiptare kanë njoftuar se sot do të jenë fluturimet dhe lundrimet e fundit drejt Italisë. Dje janë kryer fluturimet dhe lundrimet e fundit drejt Italisë, ndërsa nga ky moment do të pezullohen të gjitha udhëtimet ajrore dhe ato me traget nga Shqipëria drejt shtetit fqinj.