Arrestohet ish- zyrtari i hipotekave, pjesë e grupit të strukturuar kriminal "Vol- Vo 4"

TIRANË - Kapet një tjetër i kërkuar në kuadër të operacionit policor "Vol- Vo 4", i zhvilluar në tetor të vitit 2018, ku u godit një grup i strukturuar kriminal në fushën e krimit ekonomik. Në pranga ka rënë ishpunonjësi i Hipotekës së Lezhës, Eraldo Smaçi, lindur e banues në Pllanë të Lezhës. Ky shtetas ishte shpallur në kërkim, në kuadër të megaoperacionit policor të koduar "Vol- Vo 4". Gjykata e Shkallës së Parë për Krimet e Rënda i ka caktuar masën e sigurisë "Arrest në burg" në mungesë, si i dyshuar për kryerjen e veprave penale "Shpërdorim detyre", "Falsifikimi i dokumenteve", "Falsifikimi i vulave, i stampave ose i formularëve", "Shpërdorimi i tokës" në bashkëpunim, në kuadër të grupit të strukturuar kriminal, "Grupi i strukturuar kriminal", "Kryerja e veprave penale nga organizata kriminale dhe grupi i strukturuar kriminal".