Goditen shpërndarësit e heroinës në Korçë, Pogradec e Maliq, 2 të arrestuar dhe 10 të proceduar

KORÇË - Pas një hetimi 1mujor, Policia e Korçës ka goditur shpërndarësit e heroinës në qytetet juglindore të Korçës, Maliqit dhe Pogradecit. Në pranga kanë përfunduar R. L., 38 vjeç dhe J. K., 27 vjeç banues në Korçë, ndërsa janë proceduar në gjendje të lirë 10 të tjerë. Nga operacioni u janë sekuestruar 25 doza heroinë dhe 4 kokrra metadoni. "Strukturat e Hetimit të Krimit në Drejtorinë Vendore të Policisë Korçë, nën drejtimin e Prokurorisë të Rrethit Gjyqësor Korçë, në vijim të punës për goditjen e paligjshmërisë në fushën e prodhimit dhe shitjes së narkotikëve, pas një hetimi 1- mujor kanë finalizuar me sukses operacionin policor të koduar ' Sprinter', si rezultat i të cilit u bë kapja dhe arrestimi në flagrancë i shtetasve R. L., 38 vjeç dhe J. K., 27 vjeç, banues në Korçë. Filloi procedimi penal në gjendje të lirë edhe ndaj 10 shtetasve të tjerë, banues në Korçë, Pogradec dhe Maliq", njoftoi ndër të tjera policia e qytetit juglindor. Ndërkaq, mësohet se gjatë zhvillimit të fazave të këtij operacioni, u dokumentua me prova ligjore aktiviteti kriminal i shtetasve të mësipërm, të cilët në bashkëpunim me njëritjetrin shpërndanin sasi me lëndë të dyshuar narkotike të llojit heroinë kundrejt pagesës në qytetin e Korçës. Në cilësinë e provës materiale iu gjetën dhe sekuestruan 25 doza me lëndë të dyshuar narkotike të llojit heroinë, si edhe 4 kokrra metadoni. Materialet i kaluan Prokurorisë Pranë Gjykatës së Shkallës së Parë Korçë për veprën penale "Prodhimi dhe shitja e narkotikëve, kryer në bashkëpunim".