Rrezohet kërkesa për shfuqizimin e të formulës së kompensimit
Ish-
pronarët kanë kundërshtuar fort formulën e kompensimit të ligjit të vitit 2015 për kompensimin e pronave, e cila është parashikuar në neni 6 të tij. Shfuqizimi i këtij neni të ligjit është rrëzuar dje nga Strasburgu. "Kërkuesit u ankuan se kishte pasur shkelje të nenit 6 § 1 për shkak të mosekzekutimit të vendimeve përfundimtare nga autoritetet e brendshme për të përfituar kompensim, si dhe për shkak të zbatimit prapaveprues të Ligjit për Trajtimin e Pronës ndaj vendimeve përfundimtare të cilat kishin fituar forcën e gjësë së gjykuar",- thuhet në njoftimin e Strasburgut. Gjykata çmoi se, për shkak se Ligji për Trajtimin e Pronës kishte krijuar një mjet ligjor të brendshëm dhe se kërkuesit kishin pasur ose kanë ende mundësi t'u drejtoheshin gjykatave të brendshme ose të marrin kompensim të plotë, pretendimi i tyre për moskekzekutim të vendimeve përfundimtare të kompensimit ishte haptazi i pabazuar dhe duhej rrëzuar. Gjithashtu, gjykata vlerësoi se një vendim përfundimtar i nxjerrë sipas legjislacionit të mëparshëm, i cili kishte njohur të drejtën e kompensimit "sipas një prej mënyrave të parashikuara në ligj", nuk mund të pretendohej se kishte fituar forcën e gjësë së gjykuar në lidhje me formën e saktë të kompensimit ose vlerën e tij financiare. Për më tepër, efekti prapaveprues i Ligjit për Trajtimin e Pronës nuk ishte drejtuar ndaj kërkesave të veçanta individuale, por kishte qenë një përgjigje gjithëpërfshirëse ndaj vendimit pilot të gjykatës, i cili kishte si synim të siguronte një zgjidhje të qëndrueshme ndaj mosekzekutimit prej kohësh të vendimeve përfundimtare. Gjykata mbajti qëndrimin se efekti prapaveprues i Ligjit për Trajtimin e Pronës ishte i mbështetur në një interes të qartë publik. Ankesa e dytë sipas nenit 6 duhej rrëzuar si haptazi e pabazuar. Së fundi, Gjykata vendosi, njëzëri, të bashkonte të gjitha kërkesat dhe t'i deklaronte ato të papranueshme.