‘ Të pavarurit’ në Kuvend, Ruçi: Jo vendime në sirtar, punësoni njerëzit
Guvernatori: Gati plani post krizë. Kreu i KLP: Kuvendi të ngrejë pagat, t’i ‘ lajë duart’ me SPAK Kryeprokurori: Na duhen ekspertë dhe mbështetje financiare
Kryetari i Kuvendit Gramoz Ruçi kri tikoi dje institucionet e reja të drejtësisë teksa u kujtoi se shqiptarët presin shumë nga drejtësia. Përmes një videokonferencë Gramoz Ruçi u bëri thirrje për një reagim të shpejtë. Sipas tij, edhe pse jemi në situatë emergjence, duhet të garantohet që të sundojë shteti i së drejtës dhe shërbimet e të drejtat e qytetarëve të jenë të garantuara. Ai përmendi institucionet që nuk kanë sjellë ende raportet vjetore të Kuvendit, duke i kritikuar se ato nuk jepen sipas logjikes se institucioneve, por ne kohën që i kërkon Kuvendi, i cili, sipas Ruçit, nuk i kërkon për statistike. “Sipas përcaktimeve në ligjet organikë Këshilli i Lartë Gjyqësor dhe Këshilli i Lartë i Prokurorisë, si dy institucione të reja, kanë raportuar në Kuvend për gjashtëmujorin e parë të vitit 2019 dhe Kuvendi vlerësoi pozitivisht veprimtarinë e tyre. Të dy institucionet janë në vonesë për të dorëzuar raportin e parë vjetor”- theksoi z. Ruçi. “Vendimet Kuvendit nuk duhet t’i mbani në sirtar, por t’i zbatoni pikë për pikë. Vetëm kështu mund të arrijmë të flasim me të njëjtën gjuhë mbi plotësimin e detyrave respektive nga të tri palët: Kuvendi, qeveria dhe institucionet”, tha Ruçi. Ai iu drejtua krerëve të institucioneve të pavarura: “Vendosini njerëzit në punë dhe punoni me kapacitete të plota”. Gjithashtu, ai u shpreh se ‘ kërkojmë që qeveria duhet të angazhohet më shumë se deri tani për të raportuar periodikisht në Kuvend mbi zbatimin e rekomandimeve të institucioneve të pavarura nga ministritë dhe agjencitë e saj. Ju ankoheni se nuk keni stafe, por duhet të dini që organikat i keni të plotësuara”. Në këtë kohë pandemie, Ruçi kërkoi që të respektohen të drejtat kushtetuese të qytetarëve.
PROKURORIA
Nga ana e tij prokurori i Përgjithshëm Cela tërhoqi vëmendjen për mungesën e ekspertëve në luftën ndaj pastrimit të parave. Prokurori i Përgjithshëm tregoi vështirësitë e institucionit të tij në luftën kundër pastrimit të parave dhe sekuestrimin e parave kriminale. “Jemi duke draftuar udhëzime të reja që do të ndihmojnë në mirëmenaxhimin e ngarkesës së punës të prokurorisë dhe policisë gjyqësore”, deklaroi z. Çela. Kryeprokurori Çela u shpreh gjatë diskutimit online në mbledhjen e organizuar nga Gramoz Ruçi se Prokuroria e Përgjithshme po punon në disa drejtime, nga draftet për luftën kundër pastrimit të parave, OPGJ- të, por edhe sistemin statistikor, që sipas tij ka probleme serioze. “Shifrat janë inkurajuese, ka një % dhe ngritje të numrit të personave të çuar për ndjekje penale për korrupsion. Edhe te hetimet proaktive ka një rritje. Janë hasur probleme për sa i përket veprimeve hetimore për pastrimin e parave dhe sekuestrimin e aseteve kriminale, ende ka shumë për të bërë. Ka vështirësi të natyrave të ndryshme. Prokuroria e Përgjithshme ka marrë një rol proaktiv. Për të rritur luftën kundër pastrimit të parave, ne jemi duke ndërmarrë një ristrukturim brenda prokurorisë që hetojnë këto vepra penale dhe të rrisim bashkëveprimin me institucionet e tjera. Po draftojmë një memorandum me ministrinë e ekonomisë, brendshme dhe policisë për realizimin e objektivave. Shumë shpejt do të kemi rezultate konkrete. Do të ketë masa të tjera që do të lehtësojnë bashkëveprimin mes prokurorisë dhe policisë gjyqësore, jemi duke draftuar udhëzime të reja për menaxhimin e punës. Do të ishte e nevojshme që prokurori që do të caktohet pranë eurojust të kishte tagrin e përfaqësimit të dy prokurorive, të përgjithshme dhe SPAK. Është e nevojshme edhe mbështetja financiare për këtë prokuror për qëndrimin e tij në Hagë, i është kërkuar ministrisë së Drejtësisë ndihmë. Sistemi ka probleme serioze. Prokuroria nga 2014 ka vendosur një sistem të menaxhimit të çështjeve, por për fat të keq, por edhe reformës, sistemi statistikor, i projektuar përmes këtij sistemi kompjuterik nuk arrin të përpunojë të gjitha të dhënat. E kemi ngritur shqetësimin dhe jemi duke ndërmarrë hapat për ta update- ur. Hartimi i politikave penale nuk mund të jenë për sa kohë sistemet statistikore do të jenë defektoze” – theksoi z. Çela.
EKONOMIA
Pavarësisht rënies ekonomike që do pasojë kriza e shkaktuar nga pandemia, vera do të sjellë, sipas Gent Sejkos, Guvernatorit të Bankës së Shqipërisë, shëndoshje të financave në vend. Guvernatori i Bankës së Shqipërisë Gent Sejko u shpreh se tashmë po mendojnë për situatën post krizës, pasi momenti i emergjencës ndërsa u shpreh besimplotë se vera do sjellë situatë të përmirësuar sidomos nga ana ekonomike. “Objektiv kemi stabilitetin financiar dhe të çmimeve. Ka kaluar momenti i emergjencës dhe ne e kemi përballuar. Momentet e para ishin të stresuara, tani po shohim masat që mund të ndërmarrim për situatën post krizë. Kemi pasur një bashkëpunim shumë të mirë institucional. Shpresojmë që vera do të përmirësojë jo vetëm nga ana shëndetësore, por edhe ekonomike. Situata do të jetë me rënie ekonomike, kjo është e pranuar në të gjithë botën. Kjo do të jetë situatë kalimtare. Pasojat nuk do të mbarojnë me fundin e majit, do të vijojnë, por rëndësi ka adresimi. Kemi punuar dhe kemi qenë me fat që situata na ka gjetur me likuiditet. Jemi munduar të ruajmë inflacionin, kursin e këmbimit. Po e monitorojmë, shpresojmë të kemi stabilitet. Elementët kryesorë kanë qenë ulja e normës bazë të interesit, po diskutojmë një shtyrje tjetër të pagesave” deklaroi Sejko.
SPAK- U
Kreu i KLP- së, Gent Ibrahimi kërkoi nga Kuvendi që të ‘ lajë duart’ duke miratuar ngritjen e pagave për prokurorët e SPAK- ut. Një kërkesë ai e kishte edhe për pensionet suplementare, kur tha se institucioni që drejton është përjashtuar. Detyrim që kryeparlamentari Ruçi njoftoi se do të përmbushet shumë shpejt. “Ne jemi përjashtuar nga pensionet suplementare, pavarësisht presionit tonë, nuk është bërë. Edhe për sa i përket pagës, për shkak të dekretit të presidentit që nuk është diskutuar nga parlamenti nuk është zgjidhur kjo çështje. Kuvendi t’i lajë duart në raport me SPAK, sikur është edhe ngritja e pagave për prokurorët. Në 2020 do të japim rezultatet e para për meritokracinë në sistemin e prokurorisë. Do të japim modelin e parë” – theksoi z. Ibrahimi. Kryeparlamentari u dha të drejtë dhe kritikave që Avokatja e Popullit, Erinda Ballanca u bëri disa ministrive që nuk argumentojnë përgjigjet refuzuese ndaj kërkesave të këtij institucioni. Ballanca shprehu rezerva dhe për moslejimin e komisionerëve të saj në objektet e shpallura si karantina. Por Ruçi u kujtoi institucioneve të pavarura edhe detyrimet e tyre, që në shumë raste nuk respektojnë afatet e dorëzimit të raporteve vjetore dhe nuk përmbushin rekomandimet e Kuvendit.