Operacioni “Combination”, përfundojnë në pranga dy shpërndarësit e drogës, procedohen blerësit

Policia sekuestron doza kanabisi dhe para

TIRANË

- Policia e Ti ranës ka finalizuar operacionin e koduar “Combination”, duke goditur një aktivitet kriminal të shpërndarjes së lëndëve narkotike. Dy persona janë arrestuar dhe janë proceduar dy të tjerë. “Shërbimet e Komisariatit të Policisë Nr. 2 Tiranë, pas informacioneve të marra në rrugë operative për dy persona që merreshin me shpërndarje të lëndëve narkotike në disa zona të Tiranës, organizuan punën për identifikimin dhe lokalizimin e këtyre shtetasve. Pas identifikimit dhe lokalizimit të këtyre shtetasve, shërbimet e Komisariatit të Policisë Nr. 2 i kanë mbajtur nën vëzhgim për të bërë të mundur kapjen e tyre në flagrancë. Pas vëzhgimit të kryer, shërbimet e Komisariatit të Policisë Nr. 2, në bashkëpunim me Seksionin për Hetimin e Narkotikëve të DVP Tiranë kanë finalizuar me sukses operacionin e koduar ‘ Combination’, si rezultat i të cilit u bë i mundur arrestimi në flagrancë i shtetasve H. H., 29 vjeç dhe A. A., 26 vjeç, banues në Tiranë. Gjithashtu, u proceduan në gjendje të lirë shtetasit A. Xh., 21 vjeç dhe D. V., 23 vjeç, banues në Tiranë”, thuhet ndër të tjera në njoftimin e policisë. Ndërsa sqarohet se arrestimi i shtetasve H. H. dhe A. A. u bë, pasi në bashkëpunim me njëri- tjetrin merreshim me shpërndarjen e lëndës narkotike kanabis sativa. Gjatë kontrollit të këtyre shtetasve dhe kontrollit në banesa u gjetën dhe u sekuestruan disa doza me lëndë narkotike, një shumë prej 404.000 lekësh të reja dhe 4 telefona celularë të markave të ndryshme. Materialet procedurale do t’i kalojnë Prokurorisë pranë Gjykatës së Shkallës së Parë Tiranë për veprime të mëtejshme hetimore, për veprat penale “Prodhimi dhe shitja e narkotikëve”, e kryer në bashkëpunim, në ngarkim të shtetasve H. H. dhe A. A., si dhe për veprën penale “Prodhimi dhe shitja e narkotikëve”, në ngarkim të shtetasve D. V. dhe A. Xh.