Hidhen hapat e para për rifillimin, qeveria dhe FSHF do ulen në tavolinë
Menjëherë pas ftesës së Ministrisë së Shëndetësisë, federata paraqet grupin e saj të punës Manastirliu: Futbolli nuk do jetë i vetëm kundër COVID- 19
Shteti i zgjat dorën sportit dhe futbollit në veçanti. Më në fund dje, pas një "lufte" të gjatë shkresash, dokumentesh dhe shfaqjes mediatike, Ministria e Shëndetësisë ka vendosur t'i japë një përgjigje Federatës Shqiptare të Futbollit. Kreu i këtij dikasteri, Ogerta Manastirliu, në një prononcim për "News24", ka theksuar se sikundër çdo fushë e jetës, as futbolli nuk do të jetë i vetëm në luftën kundër koronavirusit. Manastirliu pohon se Ministria e Shëndetësisë i është drejtuar sot FSHF- së për ngritjen e një grupi pune të përbashkët në ngritjen e protokolleve të sigurisë me synimin hapjen e aktiviteteve sportive, duke nisur fillimisht nga stërvitjen e skuadrave. Pas fjalës së Manastirliu, Ministria e Shëndetësisë i ka dërguar një shkresë zyrtare FSHF- së, ku veç sa theksoi live për "News24" ministria Manastirliu, i ka kërkuar qeverisë së futbollit të dërgojë përfaqësuesit e saj për fillimin e punës për krijimin e këtyre protokolleve. "Komiteti Teknik i Ekspertëve po punon për protokollet e posaçme për hapjen graduale të aktiviteteve sportive, sipas strategjisë së rihapjes të miratuar nga ky komitet. Në këtë kuadër do të vlerësonim bashkëpunimin tuaj për vijimin e hartimit të protokolleve të posaçme nëpërmjet krijimit të një Grupi të Përbashkët Pune. Jeni të lutur të dërgoni përfaqësinë tuaj për të finalizuar hartimin e këtyre protokolleve", lexohet ndër të tjera në dokumentin që Ministria e Shëndetësisë i ka nisur dje federatës.
REAGIMI I SHPEJTË I FSHF- SË
Federata Shqiptare e Futbollit nuk ka humbur kohë dhe pak orë pas shkresës zyrtare të Ministrisë së Shëndetësisë, është përgjigjur duke prezantuar dhe grupin e saj të punës. Në shkresën zyrtare që Sekretari i Përgjithshëm i FSHF- së, Ilir Shulku, i ka dërguar ministres Manastirliu, bëhet e ditur se federata do të përfaqësohet në këtë tavolinë nga Gianluca Stesina, përgjegjësi i departamentit mjekësor në FSHF, Mel Ostreni, mjeku i Kukësit dhe një nga emrat më të njohur të mjekësisë sportive në vend, dhe Arjana Sina, mjeke imazheriste në federatë. "Jemi në pritje të koordinimit të takimit në kohën më të parë të mundshme",- mbyll letrën e tij sekretari Shulku.