SPAK nis hetimet për "Teatrin", Budina: Tentativë vrasjeje

"Aleanca për Teatrin", protestë pranë prokurorisë: Duam drejtësi

Prokuroria e Posaçme Antikorrupsion ka fil luar zyrtarisht hetimet për shembjen e Teatrit, me prokuror të çështjes Ervin Kondilin. Gazetarja Klodiana Lala ka treguar të gjitha kallëzimet e "Aleancës për Mbrojtjen e Teatrit". Së fundmi janë paditur në SPAK kryebashkiaku Veliaj si dhe nënkryetari Arbjan Mazniku. Ndërkohë, dje paradite në orën 11: 00 "Aleanca për Mbrojtjen e Teatrit" e zhvendosi protestën para SPAK- ut për të kërkuar drejtësi. Përfaqësues të "Aleancës", por të mbështetur edhe nga qytetarë qëndrojnë para godinës së SPAK- ut, ndërsa i pari që ka marrë fjalën para protestuesve ka qenë regjisori Robert Budina. Ky i fundit pohoi se, "SPAK- u duhet të hetojë tentativën për vrasje nga policia, pasi brenda Teatrit gjatë kohës që po niste shembja, kishte artistë". Regjisori Budina tha se, "do të vazhdojnë protestat deri sa të shohin një lëvizje nga prokuroria" dhe shtoi se, "po na bëjnë presion me mesazhe, kërkojmë mbështetjen e popullit. Nuk flasim për emra, se nuk duam ta bëjmë telenovelë që të qarkullojnë nëpër media".

Sipas tij, "kemi dëshmitë e njerëzve që dëgjuan fadromat, që kishin filluar të godisnin, pamje filmike. Njerëzit ndërkohë që rrëzohej fasada, dilnin me vrap nga godina. Pamjet janë të qarta. Do i çojmë ku janë specialistë nëpër botë. Kemi kërkuar që faktori ndërkombëtar të hapë hetim. Kanë thënë ' po, nëse do të hapet, do të sjellin prokurorë ndërkombëtarë'. Protestat absolutisht do i vijojmë nëse nuk lëviz prokuroria. Ne na takon të fitojmë legjitimitetin që këta janë të kapur. Në momentin final duhet një revoltë, një bllokim total që të fillojnë që të lëvizin". Budina me keqardhje tha se, "nuk e mbrojtëm dot. Ne do ta çojmë këtë lëvizje në të gjithë Shqipërinë, prandaj ata kanë detyrë të mos e çojnë popullin në përplasje me qeverinë. Prandaj të hapin procese dhe t'i bëjnë me dije popullit. Do ta çojmë deri në fund betejën tonë". Aktivistja dhe avokatja Ardiana Kalaja nga protesta për Teatrin Kombëtar para SPAKut i bëri thirrje këtij institucioni të ri të drejtësisë që të arrestojë kryetarin e bashkisë, Erion Veliajn dhe nënkryetarin Arbjon Maznikun, nën akuzën e shpërdorimit të detyrës dhe korrupsionit masiv. Ajo tregoi edhe paditë që kanë bërë për këtë çështje.

"Kryetari i bashkisë Veliaj dhe Mazniku kanë kryer jo vetëm një vepër kriminale, por i kanë shkaktuar buxhetit të shtetit një dëm të konsiderueshëm. Në këto kushte, Teatri Kombëtar të qëndrojë dhe do të rindërtohet atje ku ka qenë. Ne sot kemi ardhur me kërkesa specifike për strukturën e SPAK- ut. Së pari, kërkojmë marrjen e masës ' sekuestro preventive' dhe ' pezullim të punimeve'. Kërkojmë marrjen e masës ' arrest me burg' për shtetasin Erion Veliaj, me funksion kryetar bashkie, i akuzuar për ' shpërdorim detyre' dhe ' korrupsion pasiv'. ' Arrest me burg' për Arbjan Maznikun me funksion nënkryetar i bashkisë, akuzuar për ' shpërdorim detyre dhe korrupsion'. Provat janë në SPAK, indicet janë aty. SPAK- u të bllokojë çështjen deri në marrjen e vendimit nga Gjykata Kushtetuese. Kemi bërë disa padi. Padia e parë, ndaj ministrit të Brendshëm, Sandër Lleshajt dhe drejtorit të Policisë së Shtetit, Ardi Veliut. Padia e dytë, ndaj Veliajt dhe kreut të këshillit bashkiak. Padia e tretë, ndaj ishministres së Kulturës, Mirela Kumbaro", tha Kalaja.

MATERIALET PO DIGJEN

Pedagogu Ervin Goci tha se protesta për Teatrin Kombëtar është protestë poli

tike dhe çështja është politike. Duke folur në protestën para SPAK- ut, Goci tha se denoncimet për Teatrin ishin bërë para shembjes dhe mosreagimi i SPAKut solli ato vendime. "Kemi qenë në godinë kur jemi sulmuar. Shteti përdori dhunë, përdori forcë. Jemi njerëz që jetojmë si azilantë. Protesta është politike, vijmë në statusin e qytetarëve shqiptarë. Këto denoncime i kishim bërë më parë. Këto reagime kanë ardhur pasi SPAK- u nuk ka reaguar në kohë.

Tani e ka detyrën dyfish. Ne do të sjellim kallëzime të tjera. Çështja është politike. Komuniteti ndërkombëtar duhet të kuptojë që çështja është thellësisht politike dhe qytetarët shqiptarë e kanë të qartë dhe nuk kanë ndërmend të tërhiqen. Ne e kemi vënë sloganin tonë ' duam drejtësi për liri'", deklaroi Goci. Ai tha se po çohen materiale të Teatrit Kombëtar për t'u djegur në inceneratorë, duke iu kërkuar prokurorëve të reagojnë shpejt.