Po luante në tunelin e vendosur për dekorin e festave të fundvitit, 5- vjeçarin e zë korrenti e vdes
Ngjarja tragjike në Berat, reagon bashkia: Po kryejmë inspektim të hollësishëm në rrugë Nëna rrëfen ngjarjen e rëndë: Kur djali shkoi për të marrë ujë, e kapi korrenti, e çova në spital
Një 5- vjeçar nga Bera ti ka gjetur vdekjen mëngjesin e djeshëm në parkun e qytetit. Ai ka qenë duke luajtur në tunelin me drita, pjesë e dekorit të bashkisë për festat e fundvitit, kur ka rënë në kontakt me rrymën elektrike të disa telave të zhveshur të tunelit.
Pasi ka rënë në tokë duke u dridhur kalimtarët kanë menduar se vuante nga ndonjë sëmundje dhe kanë njoftuar menjëherë ambulancën. 5vjeçari ka mbërritur në spital me shenja jete të dobëta, por mjekët, me gjithë përpjekjet e bëra, nuk kanë mundur dot ta shpëtojnë. Pas dërgimit të kufomës së fëmijës në morgun e Spitalit Rajonal Berat, kanë mbërritur edhe familjarët e tij, të cilët punojnë në tregje, ku shesin rroba të përdorura. Gjyshi i djalit dhe të gjithë familjarët e fëmijës, të tronditur nga gjithçka ndodhi kërkojnë të vihet përpara drejtësisë përgjegjësi i kësaj ngjarje tragjike. Gjyshi i djalit bën përgjegjëse bashkinë e qytetit që nuk kontrollon telat e korrentit në zbukurimet e vendosura në park ku luajnë fëmijët. Në vendngjarje kanë shkuar forca të shumta policie që po bëjnë këqyrjen e vendngjarjes dhe po punojnë për zbardhjen e shkaqeve të saj si dhe vënien përpara përgjegjësisë të personit përgjegjës që duhet të kon
trollonte edhe kabllot elektrik të tunelit me drita. Edhe pse ngjarja e rëndë ka ndodhur rreth orën 09: 00 të mëngjesit të djeshëm, deri vonë në mbrëmje nuk ka asnjë informacion zyrtar, qoftë edhe paraprak nga zëdhënësja për shtyp e Drejtorisë Vendore të Policisë Berat. Ndërsa, mësohet se prokuroria e Beratit ka nisur hetimet ndaj Drejtorisë së Ndriçimit Publik në Bashkinë e Beratit, edhe pse tashmë duket e vonuar.
RRËFIMI I NËNËS
Ndërkaq, nëna e të miturit, Reshide Brahimasi ka deklaruar se ngjarja e rëndë ka ndodhur teksa fëmija shkoi për të marrë ujë. Ajo ka treguar se fëmijën në spital e ka çuar me një makinë të rastit, por vogëlushi nuk shpëtoi dot. "Më tha një 10 vjeçar, shok i tij që luanin bashkë. Unë e çova në spital me një vajzë, kishte një Benz të parkuar. E kapi korrenti se vajti për të marrë ujë", tha nëna e
dëshpëruar, Reshide Brahimasi për ' Fax News'. Ndërsa, një banor i zonës, deklaroi se në atë park, ku ndodhi ngjarja e rëndë, luajnë shumë fëmijë. "Këta që mbajnë përgjegjësi për mirëmbajtjen, marrin rrogën kot dhe asgjë nuk bëjnë" tha ai. Në lidhje me këtë ngjarjeje tragjike ku humbi jetën 5- vjeçar Aleksandër ka reaguar dhe bashkia e Beratit. Mësohet se menjëherë pas ngjarjes, bashkia ka nisur një inspektim të hollësishëm të sinjalistikës rrugore dhe linjave të ndriçimit publik në qytet.
REAGIMI I BASHKISË
Bashkia e Beratit thekson se është e hapur për bashkëpunim me institucionet përkatëse për zbardhjen e plotë të ngjarjes së rëndë.
"Ka nisur një inspektim i hollësishëm i sinjalistikës rrugore dhe linjat e ndriçimit publik në qytet. Bashkia Berat është e hapur për bashkëpunim me institucionet përkatëse për zbardhjen e plotë të ngjarjes tepër të rëndë. Bashkia Berat garanton bashkëqytetasit se siguria e jetës së qytetarëve është detyra jonë parësore dhe nuk do të tolerohet asnjë neglizhim. Ngushëllimet më të sinqerta familjes, për humbjen tragjike të jetës së të dashurit të tyre!", thuhet në reagimin e bashkisë.