INTERVISTA
Platforma, presidenti: Mbron reformën në drejtësi. Qëllimi, plotësimi i 15 kushteve të BE- së
Presidenti Ilir Meta dha dje shpjegime në lidhje me qëllimin e platformës me 14 pika, që ai propozoi para pak ditësh. Në një intervistë për "Albanian Daily News", Meta u shpreh se qëllimi i vetëm ka qenë zbatimi i Kushtetutës dhe 15 kushteve të BE- së. Ai bëri të ditur se në thelb, kjo platformë do të mund të sigurojë moscenimin e Reformës në Drejtësi. Presidenti reagoi pas publikimit të mesazhit të diplomatit të huaj, duke thënë se shërben si një kambanë alarmi për të gjithë.
Z. president, cili është qëllimi i platformës suaj?
Me shpalljen e gjendjes së fatkeqësisë natyrore, të gjithë aktorët politikë vendës shfaqën një sjellje të përgjegjshme dhe një frymë të re bashkëpunimi, në shërbim të interesit më të lartë ndaj qytetarëve dhe vendit. Me këtë frymë, unë organizova dy mbledhje të Këshillit të Sigurisë Kombëtare, ku pavarësisht pikëpamjeve të ndryshme, mbizotëroi ndjenja e përgjegjshmërisë. Më 23 mars 2020, gjatë një takimi pune me ambasadoren e SHBA- ve, diskutuam se si mund të ndërtojmë më tej mbi këtë frymë, veçanërisht në kontekstin e nisjes sa më parë të negociatave të anëtarësimit me BE- në, kur në qershor pritej prezantimi i kuadrit negociator për Shqipërinë dhe Maqedoninë e Veriut dhe raportet e progresit për secilin vend. Ramë dakord se zbatimi i prioriteteve kyçe, sipas përgjegjësive të secilit aktor dhe në një frymë bashkëpunimi janë e vetmja mënyrë për të ecur përpara. Gjatë këtij takimi i premtova ambasadores se do t'i nisja shumë shpejt një projekt- platformë, që do të mund të shërbente si pikënisje për një dialog të strukturuar dhe hap pas hapi deri në një dokument të konsoliduar, të dakordësuar të të gjitha palëve, me angazhime konkrete dhe të matshme për çdo aktor institucional. Në datën 8 prill, kjo projekt- platformë iu përcoll ambasadores, siç kishim rënë dakord.
A e cenon kjo platformë reformën në drejtësi?
Kushdo që e lexon këtë projekt- platformë, mund ta shohë qartë që ka vetëm tri referenca bazë: 15 kushtet e Bashkimit Europian, zbatimin e Kushtetutës dhe ligjeve në fuqi dhe orientimin sipas rekomandimeve që jep Projekt- Opinioni i Komisionit të Venecias i datës 6 mars 2020, i kërkuar nga Kuvendi i Shqipërisë. As BE- së, as Kushtetuta dhe as Komisioni i Venecias nuk e cenojnë reformën në drejtësi, përkundrazi nxisin, inkurajojnë dhe kërkojnë zbatimin më rigoroz të saj. Ashtu siç rekomandojnë edhe BE- ja, edhe Komisioni i Venecias për të disatën herë, ashtu siç e përmban fryma e Kushtetutës dhe ashtu siç e kam përsëritur pa u lodhur edhe unë, zbatimi kushtetues i reformës në drejtësi duhet të ruajë frymën e konsensusit për të shmangur kapjen nga forca politike në pushtet. Të gjithë e dimë