KQZ- ja drejt shkrirjes, do të drejtohet nga një kryekomisioner me mandat 7- vjeçar

Me ndryshimet e reja në Kodin Zgjedhor, KQZ- ja do të kthehet në monokratike, ku në krye do të ketë një kryekomisioner, i cili do të zgjidhet me një mandat 7vjeçar. Kryekomisioneri pritet të emërohet në bazë të eksperiencës në funksione publike si dhe në frymën e konsesusit mes të gjitha palëve politike. Deri më tani PD- ja dhe aleatët e saj nuk janë shprehur për transformimin e KQZ- së në një institucion monokratik dhe ende nuk kanë një propozim tjetër. Në mbledhjet e ardhshme të këshillit politik pritet të qartësohen kriteret nga ana e ekspertëve si dhe emri, i cili do të jetë në krye të këtij institucioni me kriterin që të jetë i pranueshëm nga të gjitha palët. Por, edhe nëse do të ketë edhe dy nivele të tjera për administrimin e zgjedhjeve, Komisionin Rregullator si dhe Komisionin i Ankimimeve dhe Sanksioneve. Komisioni Rregullator do të përbëhet me 5 anëtarë me një mandat 5- vjeçar të zgjedhur nga Kuvendi i Shqipërisë me kompetencë për të vendosur rregullat për zhvillimin e zgjedhjeve. Ndërsa 3 anëtarët e Komisionit të Ankimimeve dhe Sanksioneve do të qëndrojnë në detyrë për 9 vite radhazi dhe do të shqyrtojnë ankimimet e subjekteve zgjedhore dhe vendosjen e sanksioneve për shkelje të Kodit Zgjedhor. Komisioneri Shtetëror dhe anëtarët e dy komisioneve do të zgjidhen nga Kuvendi me jo më pak se 3/ 5 e votave. Sipas “Ora” TV, në rastin se nuk arrihen votat e nevojshme, atëherë anëtarët e Komisionit Qendror të Zgjedhjeve do të zgjidhen me short të hedhur nga administrata e Kuvendit. Por, jo vetëm anëtarët e këtij institucioni do të largohen, por edhe një pjesë e administratës do të hyjë në një fazë të re ndryshimesh.