Vendosi lëpirësen në foltore, Ralf Gjoni përjashtohet 10 ditë nga Kuvendi

Byroja e Kuvendit përjashtoi dje për 10 ditë deputetin e opozitës parlamentare, Ralf Gjonin. Shkak për këtë është bërë veprimi i tij në seancën e fundit, kur Gjoni vendosi në foltoren e Kuvendit disa lëpirëse. Në një postim në “Facebook”, Gjoni shkruan se përjashtimi i tij u bë vetëm e vetëm se kanë frikë nga e vërteta mbi teatrin e korrupsionit! Deputeti i opozitës parlamentare, Ralf Gjoni, zbuloi prapaskenat që fshihen pas përjashtimit të tij me 10 ditë nga Kuvendi. “Kam dyshime se po përgatitet një plan ogurzi për të kaluar një palodraft, për të anashkaluar reformën zgjedhore së bashku me opozitën rrugore. Por, kjo nuk është reformë zgjedhore pa ndryshimin e sistemit elektoral. Unë jam përjashtuar se kam evidentuar intimidimin e votës së disa deputetëve të opozitës parlamentare nga elementë të qarqeve socialiste. Ndaj deputetëve është ushtruar presion psikologjik dhe janë joshur financiarisht”, - u shpreh z. Gjoni.