Dërguan afër 4 tonë drogë nga Shqipëria në Itali, në pranga shqiptarë e italianë

ITALI

- Guardia Di Fi nanza e Brindizit në bashkëpunim me Antimafien italiane të Leçes kanë përfunduar me sukses dje në mëngjes operacionin e quajtur "San Silvestro 2018", që ka çuar në shkatërrimin e një grupi trafikantësh nga Shqipëria dhe Italia. Të arrestuar kanë përfunduar gjithsej 9 persona, 5 janë lënë në burg dhe katër janë në "arrest shtëpie". Mes të arrestuarve ka edhe shqiptarë të dyshuar se bënin lidhjen mes trafikantëve nga Durrësi në shtetin fqinj, raportojnë mediat italiane. Gjithsej, autoritetet italiane kanë sekuestruar gati 6 tonë lëndë narkotike, mes të cilave hashash, kokainë, heroinë, por edhe makina luksoze. Në këtë operacion është bashkëpunuar edhe me autoritetet e portit të Durrësit dhe policinë shqiptare. Mësohet se hetimet kanë nisur nga policia e Brindisit në vitin 2017, të cilat kanë bërë të mundur rindërtimin e të gjithë zinxhirit të trafikut të paligjshëm, nga furnizimi në organizatat kriminale Ballkanike, deri në pritjen e dërgesave narkotike përgjatë brigjeve të Apulian, që më pas të dërgoheshin te blerësit në të gjithë vendin. Në tërësi, 24 persona u shpallën si bashkëpunëtorë të organizatës kriminale dhe 15 u arrestuan.