Qëllonin me armë zjarri e terrorizonin banorët, përfundojnë në pranga pesë persona, mes tyre një femër
Trafikantët e drogës u denoncuan nga banorët e fshatit Panarit
5- vjeçarja Roada Dollani e lënë në masën e sigurisë “arrest shtëpie” për akuzën e trafikut të drogës, së bashku me 4 persona, një prej të cilëve i dënuar më parë, kanë terrorizuar me armë banorët e fshatit Panarit në Skrapar gjatë mbrëmjes së të martës, duke qëlluar në ajër me breshëri automatiku pa asnjë shkak apo motiv. Kanë qenë banorët e zonës, të cilët kanë referuar rastin në polici, e që pas uniformat blu kanë mësyrë në fshatin Panarit në zonën nga vinin të shtënat me armë. Për të shmangur një përplasje me armë dhe mos rrezikuar jetën e tyre dhe të banorëve të fshatit, efektivët e policisë kanë rrethuar zonën dhe kanë pritur të zbardh dita për të vënë në pranga 5 trafikantët që lëviznin të lirisht të ndihmuar dhe nga drejtësia. Gjatë aksionit të policisë kanë rënë në pranga shtetasit: Roada Dollani 25 vjeç, Daniel Daja 42 vjeç i dënuar më parë për “Prodhim dhe shitje e lëndëve narkotikëve”, Mateo Shkurta, Aldo Daja e Soni Daja 35 vjeç , Ahmet Saraçi 43 vjeç dhe Florian Mihaj 33 vjeç. Ndërkaq, policia ka sekuestruar 1.636 fara kanabisi, tri armë zjarri kallashnikov, lëndë narkotike, një motomjet të vjedhur, municion luftarak dhe një automjet fuoristradë me të cilin qarkullonin personat e arrestuar.
NJOFTIMI I POLICISË
“Specialistët e Seksionit për Hetimin e Trafikut të Paligjshëm dhe Narkotikëve në Drejtorinë Vendore Berat, në bashkëpunim me Komisariatin e Policisë Skrapar, pas njoftimit të marrë nga banorët e zonës se në afërsi të fshatit Panarit, Skrapar, po qëllohej me armë zjarri në orët e vona të mbrëmjes, menjëherë organizuan punën, duke zhvilluar dhe finalizuar operacionin policor të koduar “Panariti”.
Për shkak të errësirës dhe sigurisë së jetës të punonjësve të Policisë, gjatë natës është rrethuar zona dhe janë mbajtur në vëzhgim me dylbi nate, 5 personat që herë pas here qëllonin me armë zjarri në ajër.
Me rënien e ndriçimit, shërbimet e Policisë janë afruar dhe u kanë bërë thirrje të mos bënin asnjë veprim, por t’i bindeshin urdhrit të Policisë. Personat, kur kanë parë shërbimet e Policisë, kanë tentuar të largohen me vrap duke hedhur armët e zjarrit në një zonë të pyllëzuar, por janë kapur gjatë ndjekjes nga Policia.
Në përfundim të veprimeve u bë arrestimi në flagrancë, për veprat penale “Prodhimi dhe shitja e narkotikëve”, “Trafikim i mjeteve motorike” “Armëmbajtja pa leje”, “Prishja e qetësisë publike”, “Largimi i të burgosurit nga vendi i qëndrimit” dhe “Moskallëzimi i krimit”, i shtetasve: R. D., 25 vjeç, banuese në Berat, e cila ka qenë me masë sigurie “Arrest në shtëpi”, për veprën penale “Prodhimi dhe shitja e lëndëve narkotike” kryer në bashkëpunim;
D.( E.) D., 42 vjeç, i dënuar më parë për veprën penale “Prodhimi dhe shitja e lëndëve narkotikëve”, M. Sh. alias A. D. alias S. D., 35 vjeç, A. S., 43 vjeç dhe F.( A.) M. ( Xh.), 33 vjeç, banues në Berat.
Gjatë kontrollit fizik dhe në banesat e tyre, Policia gjeti dhe sekuestroi një motomjet të dyshuar të vjedhur, i trafikuar nga vendet e BE- së, një sasi të vogël lënde narkotike, një sasi prej 1.636 farash të dyshuara cannabis sativa, tri armë zjarri kallashnikov, fishekë luftarak dhe një automjet fuoristradë me të cilën lëviznin autorët. Materialet proceduriale do t’i kalojnë për ndjekje të mëtejshme, Prokurorisë pranë Gjykatës së Shkallës së Parë Berat.