Basha mbledh aleatët, arrihet marrëveshja, 5 partitë opozitare në listë me PD

Opozita e bashkuar rinisi dje diskutimet për mënyrën se si do të përfaqësohet në zgjedhjet e 25 prillit. PD duket se është drejt përfundimit të krijimit të listave me të cilat do të shkojnë drejt zgjedhjeve më 25 prill. Kreu i LZHK- së, Dashamir Shehi ka zbuluar gjatë një interviste për Report Tv, 5 partitë e vogla opozitare që do i bashkohen listës së PD- së. Bëhet fjalë për partinë e tij, Lëvizja për Zhvillim Kombëtar, Partinë Demokristiane të Nard Ndokës, Partinë Republikane të Fatmir Mediut, Partinë Bashkimi për të Drejtat e Njeriut të Vangjel Dules dhe Partinë për Drejtësi, Integrim dhe Unitet të Shpëtim Idrizit. “Ne jemi në fazën më të mirë. Kemi pasur shumë takime dhe besoj që në javën tjetër do të konkretizojmë formulën finale. Ne grupi opozitar i partive, 5 partive që kemi qenë më parë në parlament i jemi bashkangjitur listës së PD- së. Kjo është një çështje e mbyllur. Tani do caktohen vetëm numrat dhe vendet. Deri tani mendohet që LSI do të dalë me siglën e vetë, por akoma nuk është zyrtare. Është një çështje mes PD- së dhe LSI- së. Ne kemi bërë një marrëveshje me PD- në si 5 parti të vogla. I takon PD- së që këtë marrëveshje që ka bërë me ne, ta ndjekë ose jo me LSI- në” – tha kreu i LZHK- së Dashamir Shehi. Më herët lideri demokrat Lulzim Basha akuzoi kryeministrin Rama, që sipas tij nuk mbajti premtimin e bërë në vitin 2013 për uljen e borxhit publik. Në videon ilustruese thuhet pas 2013- ës borxhi u rrit më shumë. Ndërkaq, kryedemokrati thekson më tej se është koha për ndryshim dhe shpresë. “Rama ka dështuar. Nëse këtë nuk e ndalim sot, fëmijët dhe nipërit tanë do punojnë gjithë jetën e tyre për të shlyer borxhet që merr kjo qeveri”, shprehet Basha. Kreu i opozitës shprehet se PD ka një plan konkret për t’i kthyer Shqipërisë shpresën.