Si do të votojnë emigrantët?, KQZ, sistem online për regjistrimin e kërkesave
Të
gjithë shqiptarët që banojnë jashtë vendit kanë afat deri në 24 shkurt për t’u regjistruar në mënyrë që të votojnë për zgjedhjet e 25 prillit, aty ku ata banojnë. KQZ ka përgatitur një draft të rregullave për votimin e emigrantëve dhe kushti i parë është regjistrimi i adresës se vendbanimit të përhershëm jashtë vendit. Vetë KQZ do të ngrejë një sistem online për regjistrimin e të gjitha kërkesave të emigrantëve për të votuar. “Sistemi duhet t’i kërkojë zgjedhësit nëse ka bërë regjistrimin e adresës së vendbanimit të përhershëm jashtë vendit në “Programin e regjistrimit të adresës”, pjesë përbërëse e Regjistrit Kombëtar të Gjendjes Civile”. Pasi qytetari ka regjistruar adresën, atëherë fillon faza e dytë e verifikimit të identitetit të tij, për të shmangur që një person të aplikojë në emër të një qytetari tjetër. Për këtë fazë, KQZ ka përzgjedhur dy mënyra, e para që emigranti të plotësojë një formular me të dhënat e tij dhe familjarëve, e dyta fut në skemën e verifikimit teknologjinë. “Votuesit duhet t’i kërkohet të instalojë në smartphone e tij një aplikacion, i cili do të përdoret për të automatizuar procesin e identifikimit të tij nëpërmjet teknologjive “Face ID”. Aplikacioni do të kryejë krahasimin e pamjes së tij ( foto selfie) me foton në dokumentin e identifikimit. Aplikacioni do të jetë i aftë të dallojë që personi në fjalë është i vërtetë dhe jo një foto”. Sipas Kodit Zgjedhor, vota e emigrantit do të përllogaritet në qarkun ku ai ka banesën në Shqipëri. Vendi ynë sot nuk ka të dhëna të sakta sa qytetarë jetojnë jashtë vendit, por duke krahasuar numrin e personave të regjistruar në gjendjen civile me ata që jetojnë në vendin tonë, me përafërsi mendohet se 1.3 milionë zgjedhës janë emigrante. Nga këta, 32 mijë kanë regjistruar adresën jashtë vendit në harkun kohor të dy muajve, pasi deri në nëntor asnjë emigrant nuk ishte regjistruar.