Pengmarrja për 1 mln dollarë, gjykata e Tiranës pushon pas 22 vitesh hetimi dosjen për Koço Dadon

Ja fjalët e fundit të biznesmenit fatkeq

TIRANË

- Rrëmbimi i biznesmenit të njohur Koço Dado në 8 qershor 1998, një nga historitë më të bujshme kriminale ndër vite, e gjithashtu një dosje e hetuar, e pezulluar dhe e rihetuar mes institucioneve të ndryshme, tanimë është një histori dhe dosje e mbyllur përfundimisht. Ky është vendimi i gjykatës së Tiranës që deklaron pushimin e hetimeve me kërkesë të prokurorisë së Tiranës, pasi ishte ish- Prokuroria e Krimeve të Rënda që ia delegoi hetimin e rrëmbimit të Koço Dados. Prokuroria vlerëson se kanë kaluar më tepër se 20 vite dhe ky qëndrim i prokurorisë mbështetet dhe nga gjykata, e cila thotë se për shkak të kohës së konsiderueshme që ka kaluar dhe mungesës së provave, çështja është parashkruar. Grupet kriminale më të njohura të asaj kohe, protagonistët e krimit në vend rezultojnë të skeduar, përgjuar dhe vëzhguar. Madje edhe kriminelë të njohur edhe në ditët e sotme. Biznesmenë të njohur dhe jo, dëshmitarë dhe të afërt që janë pyetur dhjetëra herë. Por në përfundim, drejtësia u dorëzua dhe nuk mundi të zbardhë rrëmbimin e Koço Dados dhe as autorësinë e atyre që hodhën eksploziv në banesën e tij gati katër muaj pasi 45- vjeçari ishte marrë peng. Një serial veprimesh hetimore të urdhëruara në kohë të ndryshme nga prokurorë të përgjithshëm dhe shefa kundër krimit të organizuar rezultuan të pafrytshme dhe në përfundim gjykata e Shkallës së Parë shpalli pushimin e dosjes që i kishte kaluar për kompetencë nga ishkrimet e rënda. As ekspertiza ndaj këtyre letrave që “Top Channel” i disponon, që u përgatitën nga rrëmbyesit për të udhëzuar familjen e tij se ku duhej t’i dorëzonin paratë. As tri kasetat ku ishte filmuar pengu nuk shërbyen për asgjë. Koço Dado u rrëmbye mbrëmjen e 8 qershorit në afërsi të ish- ambasadës në rrugën “Qemal Stafa”, pasi kishte përfunduar mbledhjen e shoqatës së biznesmenëve shqiptarë. Katër rrëmbyes u afruan me një mjet tip “Ford”, njëri prej tyre i vendosi pistoletën personit që gjendej nën shoqërinë e Dados, duke i thënë “Ndal, policia!” Siç pohojnë dëshmitarët, fjala e fundit që mundi të thotë Koço Dado përpara se të merrej forcërisht ishte pyetja “Ç’keni me mua?” Ndërsa më pas, njëri prej tyre i vendosi një kapuç në kokë dhe dy të tjerë e goditën derisa e futën në automjet. Në komunikimet telefonike grabitësit patën kërkuar sasinë e 1 mln dollarëve në këmbim të lirimit të biznesmenit.