Historia e rënies së ish- futbollistit të Skënderbeut, nga Europa League në ligën e tretë hungareze
Ka
tërhequr vëmendjen e mediave ndërko mbëtare historia e ish- futbollistit të njohur të Skënderbeut, Liridon Latifi. Në kohën kur klubi korçar shpallej kampion dhe arrinte deri në grupet e Europa League, pa dyshim që Latifi ishte një lojtar kyç i formacionit dhe një prej golashënuesve më të mirë të skuadrës. Karriera e tij arriti deri aty sa në vitin 2017, ai u shit nga Skënderbeu për plot 1 milion euro te skuadra hungareze “Puskas Academy”, një klub i cili ishte në pronësi të kryeministrit hungarez Orban. Klubi i tij militonte në superligën hungareze dhe ishte pretendent për një vend në kupat e Europës çdo sezon. Bujë të madhe bëri vetëm transferimi i tij, por ai nuk shkëlqeu kurrë në Hungari. Që në ndeshjet e para, Latifi nuk e bindi trajnerin dhe aktivizohej shumë pak e shënonte shumë rrallë. Aktivizimi i tij i fundit në OTP BANK LIGA, siç njihet ndryshe superliga hungareze, ka qenë në prill 2019. Lojtari kishte një pagë tepër të lartë dhe me minutat që kishte, klubi është munduar ta heqë qafe disa herë, pa ia dalë dot. Në sezonin 2019-‘ 20, ai u huazua në Moldavi, te “Sherif Tiraspol”, me shpresën për ta shitur më vonë. Eksperienca atje ishte e tmerrshme, me klubin moldav që e ktheu mbrapsht Latifin pas huazimit me justifikimin që nuk ishte i duhuri. Hungarezët nuk e shitën dot as në verë Latifin, dhe e kaluan te skuadra e dytë, që militon në ligën e tretë dhe luhet një futboll thuajse amator, ndoshta edhe më i dobët se kampionati shqiptar. Ai shihej me habi në këtë divizion për shkak të pagës së tij ( rreth 25 mijë euro), shumë e pabesueshme në atë nivel futbollistik. Mirëpo, as në ligën e tretë Latifi nuk po shkëlqen, ku në 13 ndeshje, ka realizuar vetëm 3 gola, edhe pse luan si sulmues. Madje në ndeshjen e fundit, trajneri e largoi atë nga loja që në pjesën e parë. Mbetet mister se çfarë do të vendosë për të ardhmen e karrierës së tij Liridon Latifi, i cili dikur luante në grupet e Europa League dhe me kombëtaren tonë.