OSBE: Mos lejoni kriminelët të fusin duart në zgjedhjet e 25 prillit
Kreu i prezencës së OSBE-së në Shqipëri, Vincenzo Del Monaco, i bëri dje thirrje politikës dhe policisë së shtetit se personat e inkriminuar në vendin tonë zotërojnë armë dhe para, por në zgjedhjet e 25 prillit duhet të zbatohet ligji. Del Monaco tha se zgjedhjet e 25 prillit janë të rëndësishme për demokracinë. Gjatë fjalës së tij, në nisjen e trajnimit të punonjësve të policisë, të cilët do të angazhohen për mbarëvajtjen e këtij procesi, Vincenzo Del Monaco u shpreh se vërtet kriminalët zotërojnë shumë gjëra, por ata kanë frikë nga e vërteta. Mes të tjerash, diplomati Vincenzo Del Monaco deklaroi se OSBE do të mbështesë institucionet shqiptarë që zgjedhjet e 25 prillit të jenë me standarde ndërkombëtare. “Kriminelet zotërojnë shumë gjëra, ata kanë armë, para dhe mund të shtiren si të fuqishëm, por ajo që i frikëson më shumë është e vërteta. Patjetër që e vërteta është diçka tjetër që ne e përkthejmë me rregullat në demokraci. Prania ime këtu është pjesë e përgatitjes se një prej festimeve më të rëndësishme të demokracisë, zgjedhjet, zgjedhjet e 25 prillit. Si kreu i ri i prezencës së OSBE-së në Shqipëri jam i kënaqur të nxis mbështetjen që OSBE i ofron institucioneve shqiptarë për të organizuar zgjedhjet në përputhje me praktikat ndërkombëtare, ndërsa reflektojmë mbi rekomandimet e OSBE ODIHR”, - u shpreh ambasadori i OSBE-së në Tiranë.
Kreu i KQZ-së, Ilirian Celibashi i kërkon policisë që të zbatojë ligjin dhe që drejtuesit e saj nuk duhet të përfshihen në fushatën elektorale. “Drejtuesit e policisë nuk duhet të jenë të angazhuar që të marrin pjesë në fushatë, do të duhet të qëndrojnë të paanshëm dhe duhet të tregojnë që janë”, - deklaroi z.Celibashi. Kreu i KQZ Ilirjan Celibashi gjatë bisedës me drejtorin e Policisë së Shtetit, Ardi Veliu, tha se këto dy institucione duhet të tregojnë profesionalizëm dhe përgjegjshmëri që të mos u lënë asnjë shkak apo pretekst për kontestim palëve, ndonëse u shpreh i sigurt që ata që do t’i humbin zgjedhjet nuk do ta gjejnë fajin te vetja. “Besoj që jemi të ndërgjegjshëm që këto zgjedhje do të zhvillohen, të paktën deri më tani kështu duket, në një klimë mjaft konfliktuale politike, si për KQZ dhe Policinë e Shtetit, angazhimi i këtyre dy strukturave kërkon përgjegjshmëri, profesionalizëm për të mos u lënë jo vetëm shkaqe por as edhe pretekst, secilës prej palëve politike. Unë personalisht nuk ushqej ndonjë iluzion, jam i sigurt që ai do t’i humbasë këto zgjedhje, fajtorin do ta gjejë jot e vetja, por te KQZ, policia. Por është e rëndësishme që ne të bëjmë detyrën tonë, dhe opinioni publik do ta ndajë se kush ka bërë çfarë dhe si”, tha Celibashi. Ajo bëri të qartë se veprimtaria e Policisë së Shtetit duhet të karakterizohet nga neutraliteti dhe mosndërhyrja. “Ajo duhet të qëndrojë e paanshme. Të sigurojë trajtim të barabartë dhe mos diskriminues. Veprimtaria e Policisë së Shtetit duhet të karakterizohet nga proporcionaliteti. Veprimtaria të karakterizohet nga transparenca.