Meta thirrje Ramës: Masa të menjëhershme, banorët e përmbytur asnjë ndihmë nga shteti
Presidenti Ilir Meta shprehu dje shqetësimin për situatën e krijuar nga përmbytjet si pasojë e reshjeve të shiut. Në një reagim në rrjetet sociale, kreu i shtetit evidentoi se shumë toka dhe prona private e publike janë nën ujë, ndërsa banorët nuk po ndihmohen nga autoritetet shtetërore. Meta i bëri thirrje qeverisë që të garantojë ndihmë për çdo qytetar në zonat e përmbytura. Duke sjellë në vëmendje paralajmërimin e IGJEUM për shtim të reshjeve, Presidenti Meta kërkon që Emergjencat Civile të angazhohen dhe të marrin masa të menjëhershme. Strukturat operacionale të Mbrojtjes Civile, Grupet e Kërkim-Shpëtimit e Evakuimit dhe Shërbimet Zjarrfikëse duhet të jenë 24/24 orë në terren pranë qytetarëve në nevojë. Ministria e Mbrojtjes dhe Rezervat e Shtetit, pa vonesë, duhet të përgatisin ndihmat ushqimore për familjet, që u janë përmbytur shtëpitë. Ministria e Bujqësisë, menjëherë të dërgojë pranë banorëve në nevojë, bazën aq të nevojshme ushqimore dhe koncentratet për bagëtitë”, - tha z.Meta. Ndërsa kryeministri Edi Rama gjatë konferencës “Ekonomia në Fokus” deklaroi dje se qeveria ka bërë një bilanc për përmbytjet e tokave bujqësore dhe banesave, por tha se do të publikohet kur të përfundojë kjo situatë. “Kemi bërë bilancin për fazën më kritike dhe tani jemi në një fazë më pak kritike. Sigurisht që po ndjekim me shumë vëmendje, por është krejtësisht në nivele të arsyeshme duke pasur parasysh intensitetin e madh të reshjeve. Problemi kryesor janë rrëshqitjet e dheut, pas shumë ditësh reshje në disa akse, ku po punojmë ditë e natë. Për sa i përket përmbytjes së tokave ato janë minimale për momentin”, - deklaroi Rama.