Dje tentuan t’i eliminojnë “shokun”, kush është Julian Sinanaj që ka kryer më shumë se 20 vrasje e akte terroriste
VLORË – Marjon Mitro, personi që iu bë atentat ditën e djeshme, ishte pjesë e grupit të vrasësve me pagesë të killerit të rrezikshëm Julian Sinanaj. Ky i fundit, është cilësuar gjithmonë si një killer mjaft i rrezikshëm dhe njihet si një nga ‘hitmanët’ më profesionistë që ka operuar në Shqipëri dhe në Greqi. Jeta e Sinanajt ndryshoi në momentin kur familja e tij, njësoj si shumë shqiptarë të tjerë, vendosën që të emigronin për në Greqi. Prindërit, të dy me origjinë nga Tepelena, vëllai dhe Juliani lanë qytetin e Elbasanit dhe u zhvendosën në Athinë për të nisur një jetë të re. Por gjërat nuk shkuan edhe aq mirë për familjen Sinani. Të përballur me problemet e para, çifti i bashkëshortëve vendosi që të ndahej, duke ndikuar te Juliani, tashmë një adoleshent. I treguar me gisht nga shoqëria, që e klasifikonte si “shqiptari”, me probleme në familje dhe larg atdheut të tij, Juliani kthehet në nxënësin perfekt për mësuesin e tij rus. Me premtimin se do ta bënte vrasësin më të mirë me pagesë, instruktori i tij rus e merr shqiptarin nën tutelë dhe fillon me zbërthimin e karakterit të tij. Rusi gjeti te Juliani një person që mund të jetë vrasës gjakftohtë, inteligjent dhe i pavarur. Me perspektiva për një të ardhme të ‘ndritur’, Julian Sinanaj u përgatit për të përdorur në mënyrë ekselente armët. Ishte i aftë të qëllonte me të dyja duart dhe me të njëjtin precision, gjithashtu ishte i shpejtë në mbërthimin dhe në zbërthimin e armëve, duke shtuar edhe njohuritë që kishte për ndërtimin e tyre. Pas trajnimit, i ashtuquajturi “ujku i vetmuar”, për 15 vite “punë” në Athinë, Pire dhe Selanik ka kryer më shumë se 20 vrasje apo akte terroriste. Më pas, kur ndjeu se jetën e kishte të rrezikuar nga ata që kishin qenë klientët e , vendosi që të lëvizte sërish. U kthye në Shqipëri dhe gjeti “strehë” në Vlorë, ku edhe do të ringrinte “biznesin” e tij. I panjohur ende në treg por me metodën e tij të sofistikuar për të eliminuar shpejt, pa gjurmë dhe gjakftohtësisht, Sinanajt i shkoi emri aty ku duhej. Për të folur me klientët e tij, ai hapte një adresë e-maili. Aty komunikonin klienti dhe “pastruesi”. Metodë e pastër dhe pa gjurmë. Fati i atyre që do të binin në dorën e Sinanajt vendosej në: beniecënvetë@gmail.com.
Por në një moment, kur Juliani e kishte ulur vigjilencën e tij, u prangos. Sigurisht që një “killer” është trajnuar edhe për të ndenjur “urtë”, por e dashura e tij jo. Ajo u thye dhe tregoi në Polici vendbanimin e tij. Aty efektivët gjetën çdo lloj arme, mina, tritol etj. Dhe sigurisht gjetën një bllok shënimesh me 20 faqe. Aty ishin shënuar të dhënat për të gjitha viktimat e tij; emri, ora e saktë e vdekjes, mënyra e eliminimit dhe fotoja e tyre.
Së fundmi, Sinanaj është zgjedhur për t’u bërë pjesë e një libri që do t’u dedikohet plotësisht të gjithë “kolegëve” të Sinanajt. Libri po shkruhet nga autori Andrea Galli dhe titullohet “Sicario”, ose shqip “Vrasësi me pagesë”.