Reagime të shumta nga bota e futbollit Prapaskenat e largimit të Dedes
Tirana mbeti pa trajner dhe zv.trajner pak përpara fillimit të sfidës përballë Laçit. Doli në pah se ka pasur një krisje mes presidentit Halili dhe trajnerit Nevil Dede. Tashmë kanë dalë detaje të reja nga episodi “unik” në futbollin shqiptar. Mësohet nga “Panorama Sport” se Tirana e nisi nxehjen me lojtarët që trajneri Dede kishte planifikuar për të hedhur në fushë nga minuta e parë e sfidës. Por, përveç njëmbëdhjetëshes titullare, në nxemje ka qenë edhe Richard Danso. Ky i fundit ishte aty sipas asaj që kishte thënë drejtori Tefik Osmani. Në momentin e përgatitjes, Dede hyn në stadium, por menjëherë sapo sheh Danso në nxemje, ai largohet papritur. Ka qenë një telefonatë mes trajnerit dhe drejtorit sportiv, ku ky i fundit i ka thënë Dedes se i sugjeron futjen e Danso në vend të Kukës. Këtë gjë, Tefik Osmani ia kishte komunikuar delegatit të ndeshjes dhe u shënua në formacion. Kjo gjë duket se e ka acaruar Deden, që shkon menjëherë te delegati për të ndrequr gabimin, por Osmani insiston që afrikani të aktivizohet. Më pas, Dede ka pasur një takim me Halilin për këtë çështje dhe pastaj është larguar. Ekipin e drejtoi
Tefik Osmani. Ndërkohë, është mësuar se krisja e trajnerit me drejtuesit të ketë nisur shumë më herët. Bëhet fjalë për transferimin e bujshëm të finlandezit Vairinen. Raportohet se Dede nuk ka qenë i kënaqur me transferimin e sulmuesit dhe ka qenë klubi që ka firmosur me lojtarin pa dëshirën e trajnerit. Pas gjithë kësaj, ka pasur edhe reagime nga personazhe të njohur nga bota e futbollit. Ishte trajneri i kurbinasve, Shpëtim Duro, i cili u shpreh: “Është një rast unikal që ndodh, në Shqipëri çfarë nuk ndodh. Unë them që nuk ka ndikuar, sepse gjysmë ore më para, ish-trajneri ka përgatitur gjithë javën skuadrën. E shkëpus këtë rast, nuk është normale, jam trajner vetë. Akoma më shumë kur ndodh ndaj një ish-futbollisti serioz dhe me personalitet në futbollin shqiptar, këta të degjenerojnë figurën. Nuk duhet ta ulim personalitetin fare. Më ka bërë përshtypje si qëndrim. Është njeri serioz”. Vetë presidenti Halili ka thënë se ai ndërhyn në formacion “kur t’i dojë qejfi” dhe se e bën këtë gjë prej 20 vitesh. Ai ka pasur përplasje edhe me Astrit Hafizin, duke e fyer këtë të fundit e duke thënë se nga e kaluara e tij, ai nuk shkon më në Shkodër, sepse do ta hedhin në lumin Buna. Kjo deklaratë e presidentit të bardhebluve vjen pasi Hafizi e kritikoi Halilin, duke i thënë se nuk mund të ndërhyjë në punët e trajnerit dhe se kohët e fundit ai ka shkarkuar shumë trajnerë. Sipas tij, nuk mund të vazhdohej duke thënë se luan Kuka apo nuk luan Halili, dhe se kjo është puna e trajnerit. Deklaratave të presidentit të klubit u është përgjigjur sërish Hafizi, duke u shprehur: “Mënyra e të folurit me Halilin tregon se çfarë diference kam unë me atë. Kush jam unë për Shkodrën dhe kush është ai për Tiranën, e dinë shumë njerëz. Djali i tij duhet të vlerësohet nga ana sportive. E ka marrë në qafë djalin. Ai është gangrena. Halili nuk e kupton deri ku arrin, sepse nuk e kupton, nuk vjen nga fusha e futbollit. Kaq e ka intelektin, nuk e ka më tepër. Halili nuk e do Tiranën, e ka bërë pronën e tij”. Ndërkohë, janë 3 emra në listë për postin e trajnerit. Bëhet fjalë për Alban Bushin, Skënder Gegën dhe Bledar Devollin. Trajneri i Shpresave nuk duket si një mundësi, pasi duket se ka frikë se mund t’i ndodhë e njëjta gjë si Dede. Ai ka thënë: “E vërteta është se kam qenë në stadium për të ndjekur ndeshjen Tirana-Laçi me synimin për të vëzhguar disa lojtarë që kam te Shpresat. Megjithatë, me sinqeritet mund të them se nuk kam pasur asnjë bisedë me drejtuesit e Tiranës. As nuk e mendoj fare këtë që po përflitet. Si tifoz, më vjen keq për këtë situatë”. Mbetet për t’u parë kush do të jetë trajneri i ri i bardhebluve, por një gjë është e qartë: kushdo që të jetë, do të mendohet mirë përpara se të ulet në stol.