Revolucioni fiskal i Partisë Demokratike
mbi çmimin e karburanteve, çka përbën një rast të paprecedentë, jo vetëm në Evropë por edhe në shkallë globale. Në çdo litër naftë që shitet në treg, qeveria shqiptare mbledh 37 lekë akcizë, 27 lekë taksë qarkullimi, 3 lekë taksë karboni dhe 7 deri në 10 lekë taksë riliencimi.
Në mënyrë të përmbledhur, nëse një litër karburant shitet 180 lekë, vlera e produktit është vetëm 68 lekë, ndërsa 112 lekë janë taksa, që qytetarët i paguajnë jo vetëm për qeverinë, por tashmë edhe për koncesionarët privatë. Kjo është dhe arsyeja kryesore se pse Shqipëria është në 10 vendet me çmimin më të lartë të naftës në botë. Vendimi i Partisë Demokratike për të hequr taksën prej 24 lekësh është lëvizja e parë në këtë drejtim që synon uljen e çmimit të karburanteve.
Një tjetër ndërhyrje e fortë që parashikon programi i Partisë Demokratike është edhe angazhimi për të hapur minimumi 110 mijë vende të reja pune si dhe rritja e pagës minimale në 36 mijë lekë në muaj. Rritja e pagave dhe krijimi i vendeve të punës nuk do të jetë i shtyrë artificialisht, siç po vepron sot Partia Socialiste. Ajo do të vijë përmes një programi të qartë për tërheqjen e investimeve të huaja me vlerë të shtuar të lartë, me know-how dhe teknologji informacioni, duke synuar ta kthejë Shqipërinë në një qendër teknologjike të Europës.
Partia Socialiste ka qenë e dështuar si me rritjen e investimeve ashtu edhe të produktivitetit në ekonomi. Të vetmet investime të huaja që kemi parë këto vitet e fundit ishin gazsjellësi TAP dhe hidrocentralet mbi lumin Devoll, të dyja të miratuara në kohën e Partisë Demokratike. Rritja e investimeve të tjera ka qenë zero. Po ashtu dhe rritja e pagave në sektorin privat, e indeksuar me inflacionin ka qenë afër zeros. Pse? Sepse kanë munguar stimujt për të pasur një ekonomi konkurruese dhe korrupsioni ka larguar investitorët seriozë.
Gjithashtu, opozita parashikon edhe rritjen e pensioneve me të paktën dyfishin e normës së inflacionit dhe në çdo rast jo më pak se 5% në vit. Rritja e pagave dhe e të ardhurave buxhetore e bën më se të mundur arritjen e këtij objektivi.
Shumë ambicioz mund të konsiderohet programi i Partisë Demokratike për bujqësinë, ku për herë të parë parashikohet një mbështetje e drejtpërdrejtë për këtë sektor me vlerën e 150 milionë eurove. Nga këto, 100 milionë euro do të jenë subvencione direkte dhe 50 milionë për infrastrukturë bujqësore. Por element tjetër që kryetari i demokratëve Basha renditi, është edhe ngritja e një agjencie për promovimin e bujqësisë dhe shitjen e produkteve. Demokratët parashikojnë në përgjithësi taksa më të ulëta dhe paga më të larta. Por, sipas Bashës, kjo qasje nuk do të krijojë deficit në buxhet, pasi taksat e ulëta, sipas tij, do t'i japin më shumë frymëmarrje ekonomisë, duke dirigjuar rritjen e saj. Shqipëria ka shumë potenciale të pashfrytëzuara, që qeverisja socialiste në tetë vitet e fundit vetëm sa i ka ndrydhur më tej. Politika e vetme e ndjekur nga socialistët ka qenë ajo e favorizimit të grupeve të caktuara dhe ndrydhja e konkurrencës së lirë. Partia Demokratike, me revolucionin e saj fiskal me taksa të ulëta dhe nxitjen e konkurrencës së lirë e inovacionit pritet të bëjë realisht ndryshimin e shu-mëpritur nga gjithsecili.