Meta kthen për rishqyrtim në Kuvend ligjin për TVSH-në, dekreton akcizat

Presidenti Ilir Meta ktheu dje për rishqyrtim në Kuvend ligjin “Për Tatimin mbi Vlerën e Shtuar në Republikën e Shqipërisë”. Ky ligj sipas tij shkel parime dhe të drejta themelore kushtetuese, duke penalizuar subjektet që operojnë në sektorët më të nevojshëm për qytetarët. “Për ilustrim, për subjektet që operojnë në fushën e turizmit argëtues, sportet ujore etj., nuk i është hequr përjashtimi nga TVSH-ja për mjetet lundruese për qëllime turistike dhe argëtim, apo heqja e shkallës së reduktuar për aktivitete dhe sektorë të tjerë. Pra, këto subjekte mbeten të favorizuara përmes përjashtimit nga TVSH-ja. Kjo do të thotë se këto subjekte që operojnë në shitjen dhe tregtimin e mjeteve lundruese ngelen të favorizuara, ndërkohë që sektorë të veçantë të ekonomisë me më shumë nevojë, diferencohen dhe mbahen në presion fiskal të diferencuar dhe joproporcional, me nevojën që dikton mbështetja e tyre. Ndërkohë që në përjashtimet e veçanta në import për makineritë dhe pajisjet, kufiri përpara këtyre ndryshimeve ligjore ishte në një vlerë mbi 50 milionë lekë. Ndërsa me ndryshimet ligjore kemi 10-fishim të vlerës së kufirit minimal mbi të cilin vihet në zbatim përjashtimi përmes këtij ligji. Rritja e këtij kufiri penalizon dhe rëndon mbi subjekte që zhvillojnë aktivitetin në këtë fushë. Përjashtimet nga zbatimi i regjimit ligjor fiskal në mënyrë të diferencuar, rrezikojnë qëndrueshmërinë e vetë ligjit bazë për Tatimin mbi Vlerën e Shtuar”, - thuhet në argumentimin e Metës. Po dje presidenti dekretoi me shpallje ligjin nr. 114/2021 “Për disa ndryshime dhe shtesa në ligjin nr. 61/2012, “Për akcizat në Republikën e Shqipërisë”, të ndryshuar”. Ky ligj u vendos të shpallej nga presidenti për sa kohë synon konsolidimin e të ardhurave nga akciza, nëpërmjet përafrimit të tyre gradual me nivelin e akcizave të parashikuara në direktivat e Bashkimit Europian, si dhe moslejimin e hapësirave ligjore për shmangie nga pagesa e akcizës, duke shfrytëzuar shkallët e diferencuara të saj për përdorues të ndryshëm.