Rama nuk i shkon në interpelancë, por delegon Spiropalin, Dule: Nuk e pranoj
Kryetari i PBDNJ-së, Vangjel Dule, kishte kërkuar një interpelancë me kryeministrin Edi Rama, që në objekt kishte politikat e qeverisë në lidhje me respektimin e të drejtave të minoriteteve. Kryeministri Edi Rama nuk ishte dje i pranishëm në seancën plenare, ndërkohë që ia delegoi interpelancën ministres së Shtetit, Elisa Spiropali. Dule u shpreh se nuk e pranon zhvillimin e kësaj interpelance, ndërsa theksoi se qëndrimi i Ramës dëshmon se respektimi i të drejtave të minoriteteve nuk ekziston në axhendën e prioriteteve të tij. “Qëndrimi i sotëm i Ramës dëshmon se respektimi i të drejtave të minoriteteve nuk ekziston në axhendën e prioriteteve të tij, mirëpo ekziston në axhendën e BE-së. Nuk e pranoj zhvillimin e kësaj interpelance. Zhvendoseni vetë në një datë tjetër të përshtatshme për kryeministrin. Ky është qëndrim abuziv”, - u shpreh Dule. Por, edhe pse interpelanca nuk u zhvillua, një përgjigje i erdhi nga ministrja e Shtetit për Marrëdhënien me Parlamentin, Elisa Spiropali, e cila ishte autorizuar që të përgjigjej në emër të kryeministrit në këtë interpelancë. “Ne vendosëm që këtë interpelancë ta mbajmë sot dhe ju vendosët që të mos e zhvilloni, por kohën tuaj e konsumuat dhe thatë disa të pavërteta, duke thënë se qeveria nuk e ka prioritet respektin e pakicave kombëtare. Në vitin 2017 kemi kaluar një ligj që është nga më progresistet në rajon dhe më gjerë. Është nga të paktat vende që e ka plotësuar këtë kuadër ligjor dhe me 8 VKM”, - deklaroi Spiropali. Ndërkohë Dule u përgjigj: “Zj.Spiropali, sapo e provuat drejtësinë e vendimin tim për të mos e zhvilluar këtë interpelancë. Respektimi i të drejtave në një parlament është çështje debati dhe jo çështje recitimesh”.