Rama para trupit diplomatik, kritika BE-së: Kemi bërë gjithçka, por na penguan
Kryeministri: Figurat e së shkuarës bëjnë kërcënime groteske me sfurqe apo rikthime në skenë “Mandati i tretë, i ëmbël dhe i hidhur. S’kemi bërë mjaftueshëm”
Para trupit diplomatik në takimin tradicional të qeverisë, kryeministri Edi Rama dha mesazhin se lufta kundër korrupsionit kërkon vullnet politik dhe se duhet kohë e durim për të pasur rezultatet që presin qytetarët. Kreu i qeverisë u ndal edhe te reforma në drejtësi nga ku përmendi se është bërë në një angazhim i palëkundur, duke marrë përsipër edhe kostot. Megjithatë, sipas kryeministrit, koha kalon, por “figurat më të dyshimta të së shkuarës gjejnë ende guximin të bëjnë kërcënime groteske me sfurqe apo rikthime në skenë, në emër të sovranitetit, dinjitetit, pastërtisë”.
INTEGRIMI
Në fjalën përshëndetëse para trupës diplomatike, Edi Rama u ndal edhe tek integrimi i Shqipërisë në BE. Sipas kreut të qeverisë, vendi ynë ka bërë gjithçka duhej, por është penguar nga forca, që siç shprehet ai, “janë përtej kontrollit tonë”. “Le të marrim BE-në. Kemi bërë gjithçka duhej, sërish e sërish për të na dhënë dritën jeshile për hapin tjetër dhe sërish e sërish, na kanë penguar forca që janë përtej kontrollit tonë. Ky është një efekt jetësor dhe ndërkohë ne do të vazhdojmë të bëjmë gjithçka mundemi për ta bërë Shqipërinë çdo vit një shtet më të besueshëm, më funksional, më demokratik e më të ngjashëm me një anëtar të BE-së. Koha fluturon dhe frustrimi i shqiptarëve rritet”, tha Rama. Ndërkohë, kryeministri tha se u arrit të bëhej reforma në drejtësi, e cila nuk ishte bërë për 25 vite me radhë. “Të marrim reformën në drejtësi. Bëmë gjithçka u desh për të nisur reformën në drejtësi pas 25 vitesh dështim. E bëmë me një angazhim të palëkundur, duke marrë përsipër të gjitha kostot në një mjedis armiqësor dhe hera-herë edhe të rrezikshëm politikisht, duke u përballur me kundërshti edhe brenda ish-koalicionit tonë. U premtuam njerëzve se sistemi i ri i drejtësisë, që sjell drejtësi për të gjithë, më në fund po vjen dhe unë ende e besoj fort që është kështu. Por duhet kohë, shumë më tepër kohë sesa koha që fluturon në mënyrë të pamëshirshme, e kësisoj ndërkohë rezultatet vijnë thjesht shumë ngadalë për njerëzit e këtij vendi, të cilët kanë pritur pafund të jetojnë në një vend ku gjithkush është i barabartë para ligjit”, - deklaroi Edi Rama.
MANDATI
Gjatë darkës së fundvitit me ambasadorët e akredituar në Shqipëri, kryeministri Rama rrëfeu para diplomatëve ndjesitë e tij pas fitimit të mandatit të tretë. “Fitimi i një mandati të tretë nuk më bëri të ndjehem i pamposhtur, por më i përulur se kurrë karshi njerëzve të Shqipërisë, të cilët na e dhanë mua dhe partisë sime besimin, ndërkohë që me plot të drejtë presin më shumë prej nesh. Më lini të rrëfehem këtu, për mua personalisht fitorja ishte njëkohësisht e ëmbël dhe e hidhur. Ndjeva se nuk kishim bërë mjaftueshëm për të shuar dasitë në një vend të përndjekur ende nga e shkuara, ku lajmësi duhej vrarë përpara se sa të dëgjohej mesazhi e ku kundërshtari politik ende shihet jo si një kundërshtar me të cilin duhet angazhuar, por si një armik që duhet shkatërruar. Pas një fitoreje të tillë më përndjek më shumë se asnjëherë më parë pafuqia e pushtetit për të ecur aq shpejt sa do të duhej me modernizimin e një vendi, i cili humbi aq shumë dekada përmes diktaturës e më pas rrumpallës, varfërisë absolute e më pas korrupsionit nga shteti njëpartiak e më pas te keqqeverisja. Kur këqyr me shpejtësinë frenetike të kalimit të kohës në detyrë përkundrejt shpejtësisë së mundshme të ndryshimit në vend, ndihem tejet i sekëlldisur. E di që ritmi i ndryshimit nuk mund të jetë kurrë mjaftueshmërisht aq i shpejtë sa duhet për t’iu përgjigjur vorbullës së dekadave të mbushura me aspirata, që u rritën si dëshira të penguara”, - deklaroi z.Berisha.