Korrupsion e shpërdorim detyre me inceneratorët, Gjykata e Posaçme lë në burg ish-ministrin e Mjedisit
Përfitoi 3.7 mln euro? Avokati: Është i pafajshëm, procesi ndaj tij politik, i bërë nga LSI-ja Zbardhet dëshmia në gjyq e Lefter Kokës: Kam zbatuar ligjin
Gjykata e Posaçme kundër Krimit të Organizuar dhe Korrupsionit (GJKKO) ka caktuar dje masën e sigurisë “Arrest me burg” për ish-ministrin e Mjedisit, Lefter Koka. Vendimi është marrë dy ditë pas arrestimit nga SPAK për aferën me inceneratorin e Elbasanit, ku dyshohet se ka përfituar 3.7 mln euro. Seanca gjyqësore ndaj ish-zyrtarit të lartë të PSsë, që akuzohet për korrupsion dhe shpërdorim detyre, ka zgjatur afro 90 minuta. Koka u paraqit në gjykatë rreth orë 11:15 në GKKO nën masa të rrepta sigurie, i rrethuar me policë e me pranga në duar, ku është njohur me masën e sigurisë. Ndërkohë, “News 24” ka siguruar videon e momentit kur ish-ministri i Mjedisit ka dalë nga ambientet e Drejtorisë së Policisë në Tiranë dhe është nisur drejt GJKKO-së. Ajo që u vu re, gjithashtu, është se Lefter Koka mbante edhe syze dielli.
“Gjykata vendosi vazhdimin e masës së sigurimit “Arrest në burg” parashikuar nga neni 238 i K.Pr.Penale caktuar ndaj personit nën hetim Lefter Haki Koka me vendimin Nr. 100, datë 12.12.2021 të Gjykatës së Posaçme të Shkallës së Parë për Korrupsionin dhe Krimin e Organizuar”, thuhet në vendimin e siguruar nga “Gazeta Shqiptare”
Gjatë seancës gjyqësore, ish-ministri ka mbajtur një qëndrim mohues ndaj 3 akuzave që rëndojnë ndaj tij në lidhje me çështjen e abuzimit me inceneratorët. Ai ka pohuar para togave të zeza se ka zbatuar vetëm ligjin. “Kam zbatuar ligjin”, mësohet të jetë shprehur Koka në prani të avokatit të tij. Ai akuzohet për veprat penale “Shpërdorimi i detyrës”, “Korrupsioni aktiv i funksionarëve të lartë shtetërorë ose i të zgjedhurve vendorë”, “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale apo i veprimtarisë kriminale”. Ndërkohë gjatë seancës, avokati mbrojtës i ishministrit ka kërkuar caktimin e një mase sigurie më të butë. “Dakord me avokatin” është shprehur Lefter Koka, i cili, gjithashtu, priste një masë sigurie më të butë se sa lënia në burg e tij. Pavarësisht mohimit të akuzave nga ana e ish-zyrtarit, gjyqtari Erion Bani ka vendosur të pranojë kërkesën e Prokurorisë së Posaçme Kundër Korrupsionit dhe Krimit të Organizuar (SPAK) dhe ta lërë në burg të akuzuarin. Ndërkohë që në kërkim janë shpallur biznesmeni Klodian Zoto dhe Stela Gugallja. Pas seancës për vendosjen e masës së sigurisë avokati i Lefter Kokës, Fatmir Braka, foli për mediat jashtë dyerve të Gjykatës së Posaçme. Avokati Braka tha se klienti i tij është i pafajshëm dhe se para gjykatës ka konfirmuar se nuk ka asnjë përgjegjësi në lidhje me procedurat e impiantit në Elbasan, e madje shtoi ai nuk aludon për asnjë person tjetër. Ndërsa shtoi se do të ankimojë vendimin e GJKKO në Gjykatën e Apelit.
REAGIMI I AVOKATIT FATMIR BRAKA
“E vërteta është që ai akuzohet për shpërdorim detyre, kur gjithë procedura, gjithë korrespondenca, që ai paraqiti sot është që aty nuk ka asnjë përgjegjësi. Nuk u tha sot nga prokuroria që ka marrë 3.7 milionë euro, përkundrazi dhe për korrupsionin që flitet si akuzë, duhet provuar që është bërë ky korrupsion. Edhe sot, edhe Lefter Koka, edhe neve, u morëm me veprën penale të shpërdorimit të detyrës si ministër. Nuk ka përgjegjësi penale Lefter Koka për inceneratorin e Elbasanit si ministër. Nuk është normale që ai të jetë person nën hetim, nuk është pyetur asnjëherë. Fillimi i këtij procesi ka qenë politik, që nga momenti i kallëzimit, në vazhdimësi dhe sot mora vesh që është bërë dhe një shtojcë nga LSI. Pra, është momenti politik që ka ndikuar në fillimin e kësaj çështjeje. Nuk është normale që një person, ish-ministër, ishdeputet, kryetar bashkie, të merret befas nën hetim e të arrestohet, kur nuk është pyetur asnjëherë. Nuk është absolutisht normale që ish-ministri të merret i arrestuar, aq më tepër që nuk i shmanget procesit, nuk manipulon provat, u gjet në shtëpinë e tij. Kallëzimi është politik. Do bëjmë ankimin tonë në Gjykatën e Apelit”,-tha avokati Braka.
ARRESTIMI I LEFTER KOKËS
Mesditën e 14 dhjetorit, SPAK-u lëshoi urdhërarrestin për Lefter Kokën, i cili shërbeu si ministër i Mjedisit në vitet 20132017.
Ai u arrestua për llogari të hetimit të SPAK me akuzën se ka përfituar 3.7 milionë euro në mënyrë të paligjshme nga kompanitë koncesionare të inceneratorit të Elbasanit, para që kompanitë i kanë marrë në buxhetin e shtetit. Ndërsa ende nuk janë ekzekutuar nga policia dy urdhër arrestet për Klodian Zoton dhe Stela Gugallaj, administratorë të kompanive koncensionare. Ndërkohë që mësohet se për këtë çështje janë në hetim dhe 10 të tjerë. Në vendimin e Gjykatës së Posaçme dhënë më 12 dhjetor është vendosur edhe sekuestro preventive ndaj kompanisë “Albtek Energy”, e cila fitoi tenderin inceneratorit të Elbasanit dhe kontraktoi për ndërtimin e tij kompaninë “Integrated
Technology Services” dhe që sipas SPAK, të dyja kontraktuan kompania të tjera për të bërë punë fiktive. Prokuroria e Posaçme dyshon se pikërisht përmes këtyre kompanive që i ka kaluar në emra të rrethit të tij familjar ka përfituar në mënyrë të paligjshme 3.7 milionë euro ish-ministri i Mjedisit. Burime nga grupi hetimor dhe Agjencia e Administrimit të aseteve të Sekuestruara dhe Konfiskuara bënë me dije se do të caktohet një administrator shtetëror dhe në menaxhimin e inceneratorit do të përfshihet edhe Bashkia e Elbasanit, në kushtet kur kompanisë i përfundon edhe kontrata koncensionare. Hetimi i SPAK ndaj procedurave të ndërtimit të inceneratorit të Elbasanit është i dyti nga SPAK, më herët në 2018 ka hetuar prokuroria e Elbasanit për korrupsion ndaj zyrtarëve të Njësisë Bradashesh në Elbasan, por kjo çështje është pushuar për mungesë provash.
KUSH ËSHTË LEFTER KOKA
Ai fitoi mandatin e deputetit më 25 prill në Qarkun e Durrësit, por vetëm dhjetë ditë përpara fillimit të punimeve të Kuvendit
të ri, më datë 1 shtator, Lefter Koka u dorëhoq nga mandati duke lajmëruar vendimin e tij përmes një postimi në ‘Facebook’. Karriera e tij politike ka nisur që në fillim të viteve 2000. Në krye të herës, Koka ka qenë kryetar i Bashkisë së Durrësit, në mandatin 2003-2007. Më pas, Koka, pjesë e LSI-së, do të bëhej ministër i Mjedisit në vitin 2013 në qeverinë e parë të Edi Ramës, i cili bashkoi forcat me Ilir Metën, asokohe në një koalicion të gjerë parlamentar. Në shtator 2017, Koka do të merrte postin e deputetit nën siglën e LSI-së, por këtë herë do të qëndronte në opozitë. Në zgjedhjet e 25 prillit, pasi nuk pranoi të digjte mandatin e tij me vendim partie në vitin 2019 – duke qëndruar kështu në parlament – Koka iu bashkua socialistëve, ku mori edhe votat për të qenë pjesë e parlamentit si deputet i Qarkut Durrës.
Lefter Koka është një person, i cili i është afruar politikës nga bota e biznesit, duke zhvilluar një karrierë të shtrirë në dy dekada.