Katër ditë në “luftë” me flakët, neutralizohen vatrat e zjarrit Në ishullin e Sazanit dhe në Mirditë
Ministria e Mbrojtjes: 122 trupa të FA-ve në terren. Greqia solli avionin ‘bombardues të ujit’
Pas katër ditësh nën “pushtetin” e flakëve, janë neutralizuar vatrat e zjarrit në në ishullin e Sazanit, por dhe në Mirditë. Kjo pas ndërhyrjes nga toka dhe ajri. Sipas burimeve zyrtare nga Ministria e Mbrojtjes, 122 efektivë të Forcave të Armatosura, 9 mjete dhe dy anije u angazhuan në operacionin e nisur pak ditë më parë për të shuar flakët. Mëngjesin e djeshëm nisi edhe ndërhyrja nga ajri. Forcave në terren iu bashkua edhe avioni Canadair CL 415, i ardhur si mbështetje nga Greqia, në kuadër të Mekanizmit të Mbrojtjes Civile të Bashkimit Evropian. Shqipëria kërkoi ndihmë nga Greqia në pamundësi të helikopterëve shqiptarë për të shuar zjarrin në ishullin e Sazanit. Megjithëse ka tre helikopterë Cougar që kanë kova për të shuar flakët në situata emergjence me zjarret, 2 janë për mirëmbajtje jashtë vendit, që kërkon kohë pasi është një procedurë e gjatë tenderimi, me përfshirje të NATO. Ndërkohë, në Shqipëri ndodhet helikopteri i tretë Cougar, që gjithashtu ka kova për flakë. Por edhe ky helikopter është në procesin e mirëmbajtjes, që merr disa javë kohë edhe nuk është ende gati për fluturim. Megjithatë, sipas burimeve nga Ministria e Mbrojtjes, edhe nëse do të ishte në gjendje, helikopteri nuk do të nxirrej në operacion pasi ishulli i Sazanit nuk është i banuar dhe s’ka rrezik në njerëz.
Ndërkaq, situata në ishullin e Sazanit është nën kontroll, ndërsa puna vijon për të shmangur totalisht mundësinë e rindezjes së flakëve për shkak edhe të bimësisë së dendur. Ndërkaq, 54 efektivë të FA iu bashkuan forcave zjarrfikëse në aksionin për shuarjen e vatrës së zjarrit në njësinë administrative Orosh të Mirditës. Në operacionin u bë e mundur shmangia e përhapjes së flakëve pranë banesave.
NJOFTIMI I MINISTRISË SË MBROJTJES
Neutralizohen vatrat e zjarrit në ishullin e Sazanit dhe Mirditë.
Neutralizohen vatrat e zjarrit në ishullin e Sazanit, pas një pune të pandërprerë nga toka dhe ajri. 122 efektivë të Forcave të Armatosura, 9 mjete, 2 anije u angazhuan në operacionin e nisur tri ditë më parë për të shuar flakët. Mëngjesin e sotëm nisi edhe ndërhyrja nga ajri. Forcave në terren iu bashkua edhe avioni Canadair CL 415, i ardhur si mbështetje nga Greqia, në kuadër të Mekanizmit të Mbrojtjes Civile të Bashkimit Evropian. Situata në ishullin e Sazanit është nën kontroll, ndërsa puna vijon për të shmangur totalisht mundësinë e rindezjes së flakëve për shkak edhe të bimësisë.
Ndërkaq 54 efektivë të FA iu bashkuan forcave zjarrfikëse në aksionin për shuarjen e vatrës së zjarrit në njësinë administrative Orosh të Mirditës. Në operacionin që u finalizua në një kohë të shpejtë u bë e mundur shmangia e përhapjes së flakëve pranë banesave.
Ministria e Mbrojtjes shpreh mirënjohjen për punën e të gjithë ekipeve të angazhuara dhe u bën thirrje qytetarëve, turistëve që këtë sezon pritet të jenë të shumtë të bëjnë kujdes, pasi kjo verë parashikohet të jetë e nxehtë dhe rreziku nga zjarret mbetet evident.
Falenderime të përzemërta Mekanizmit të Mbrojtjes Civile të Bashkimit Evropian për mbështetjen, shtetit fqinj Greqisë për përgjigjen në kohë rekord me avionin Canadair.