2.5 miliardë lekë për shëndetësinë, qytetarët: Na mungojnë shërbimet!

Kontratat koncesionare gjatë dy viteve të pandemisë morën rreth 40 milionë euro buxhetit Raporti i KLSH-së zbulon problematikën

Në raportin e fundit të paraqitur nga Fondi i Sigurimit të Detyrueshëm të Kujdesit Shëndetësor theksohet se 2.5 miliardë lekë nga buxheti i shtetit është vënë në dispozicion këtë vit për medikamente, aparatura dhe urgjenca të ndryshme shëndetësore. Megjithatë duket se këto shërbime mungojnë. Qytetarët shprehen të indinjuar se në spitale shërbimet mungojnë ose janë shumë larg standardeve normale.

Problematikat e tyre ishin nga më të ndryshmet, duke nisur që nga urgjencat bazë e deri në trajtimet më të specializuara.

Edhe implementimi i kontratës koncesionare për shërbimin laboratorik në një periudhë emergjence shëndetësore të krijuar nga COVID-19, ka sjellë kosto shtesë për taksapaguesit.

Sipas KLSH-së, gjatë transferimit të laboratorëve të QSUNT-së tek kompania koncesionare kanë mbetur miliona lekë materiale mjekësore të papërdorura në farmacinë qendrore.

“Nga auditimi është konstatuar menaxhim jo efektiv i fondeve buxhetore në vlerën totale prej 23.2 milionë lekë, vlerë e stokut të materialeve laboratorike gjendje në Farmacinë Qendrore të QSUNT të papërdorura dhe të pashpërndara, i krijuar si rrjedhojë e zbatimit të marrëveshjes koncesionare për shërbimin laboratorik në këtë institucion”, shkruhet në raportin e KLSH-së.

Gjatë dy viteve të pandemisë 2020-2021, kontratat PPP në sistemin shëndetësor kanë marrë në total 4.8 miliardë lekë (rreth 40 milionë euro).

Në një monitorim në qendrën e konsultave pranë QSUT-së, është vënë re një numër i lartë qytetarësh të cilët ishin në pritje të kryerjes së analizave, disa prej të cilëve kanë bërë me dije se janë në radhë që nga mëngjesi.

Ata kanë deklaruar se iu është kërkuar që të kryejnë analizat pranë spitaleve private, fakt i cili edhe i ka indinjuar, referuar faktit që ky shërbim duhet të ofrohet nga spitali shtetëror.

“Ambulanca më tha që duhet të bëj analizat, ndërsa tani më thonë që nuk bëhet këtu, por në privat. Po pse ta bëj në privat, kur spitali e ka këtë, pse mos e bëj këtu?” , tha një qytetare.

Disa pacientë të cilët kishin ardhur nga qytete të tjera, u shprehën se kanë pasur problematika në marrjen e rekomandimeve dhe për ta siguruar atë janë paraqitur në spital në më shumë se në një shumë se një ditë.

“Shumë vështirësi. Shko andej e këndej, jo po nuk bëhen këtu analizat, jo bëhen vend tjetër, nuk e di”, u shpreh një nga pacientet.

Kishte edhe nga ata pacientë që vlerësuan rolin e mjekëve dhe angazhimin e tyre në zgjidhjen e kësaj problematike. Ata u shprehën se përfituan shërbim pasi janë pjesë e grupit të rriskuar dhe i konsideruar si raste emergjence.

“Kam rezervuar, jam i kënaqur nga shërbimi. Po pres mjekun”, tha pacienti.