Erion Hasanbelliu i mbijeton atentatit në Belgjikë, shpallet në kërkim Kasandër Noga i akuzuar për 5 vrasje
Si u përfshinë për 20 vite në një konflikt vdekjeprurës Hasanbelliu dhe Noga Dëshmitarët: 43-vjeçari u qëllua me 6 plumba pas shpine para një hoteli
E rion Hasanbelliu i ka mbijetuar atentatit të ndodhur mbrëmjen e së dielës në Bruksel. 43vjeçari shqiptar ka mbetur i plagosur rëndë, pasi u qëllua me armë zjarri para hyrjes së një hoteli në “Adolphe Maxlaan” në Bruksel. Ai ka marrë 6 plumba në shpinë dhe në këmbë, ndërsa tashmë është përmirësuar dhe tashmë ndodhet jashtë rrezikut për jetën në spital. Ishte ende pa u errësuar, kur atentatori ka qëlluar para hyrjes së hotelit “Adolphe Maxlaan” në Bruksel, në drejtim të 43-vjeçarit Hasanbelliu. Sipas dëshmitarëve, autori erdhi nga hiçi duke hapur zjarr ndaj Hasanbelliut. Prokurori publik në Bruksel thotë se Hasanbelliu ka marrë gjashtë plumba dhe tashmë është në rrezik për jetën. Një punonjës i hotelit ka treguar se kolegu i tij, i cili ndodhej në turn në momentin e ngjarjes së rëndë, pa gjithçka dhe tashmë është në gjendje shoku. Mediat belge shkruajnë se i dyshuari kryesor në lidhje me këtë ngjarje është shqiptari tjetër Kasandër Noga, 44 vjeç. Dyshohet se tentativa për vrasje ka ndodhur për shkak të hasmërive mes Erion Hasanbelliu dhe Kasandër Nogës, sipas mediave belge. Në vitin 2000, kur Kasandër Noga, i veshur si polic, hyri me automatik në dorë bashkë me Julian Çelën dhe pasi kanë shkelmuar derën e reanimacionit ku ndodheshin të shtruar Aqif Hasanbelliu dhe Dritan Hajdini, u kanë hequr serumin nga krahu dhe me breshëri automatiku i ka lënë të vdekur në vend. Më pas hakmarrja vazhdoi edhe me një seri ngjarjesh të tjera, pasi Erion Hasanbelliu bashkë me vëllain e tij Geron Hasanbelliu ekzekutuan Julian Çelën dhe plagosën rëndë Kasandër Nogën në 2002, në Belgjikë. Më 19 gusht të vitit 2000 Kasandër Noga hyri në Sanatorium në Tiranë dhe kreu atë që u quajt masakra e “Reanimacionit” duke vrarë Aqif Hasanbelliun (babai i vëllezërve Hasanbelliu) dhe Dritan Hajdinin, shoku i Geronit. Ai u ka hequr serumin nga krahu dhe me breshëri automatiku i ka lënë të vdekur në vend. Por kjo nuk është e vetmja ngjarje që akuzohet Kasander Noga. Ai dyshohet për pesë vrasje dhe disa plagosje. Mes këtyre krimeve është dhe akuza për vrasjen e Astrit Shperdhejas në 25 gusht të 2001, ndërkohë që gjyqi u bë në Belgjikë në 2005. Po ashtu ai është dënuar edhe për vrasjen në vitin 1999 në Patos, të Kastrito Gropa dhe Edison Meminajt. Por pavarësisht këtyre krimeve të rënda, autori arriti që të ishte i lirë. 43-vjeçari Erion Hasanbelliu i njohur edhe si Mikel Rakipllari është një emër i njohur për drejtësinë shqiptare. Erion Hasanbelliu u ekstradua nga Belgjika drejt Shqipërisë në 21 tetor të vitit 2013-të pas kërkesës së Interpol, pasi ai bashkë me vëllanë akuzoheshin se në vitin 2002, kanë vrarë në Belgjikë, Julian Çelën dhe kanë plagosur rëndë, Kasandër Nogan. Sipas informacioneve, vëllai i Erionit, Geron Hasanbelliu është vënë në pranga në 14 qershor 2013, në rrugën e Barrikadave në Tiranë. Arrestimi dhe ekstradimi i tij erdhi pasi Gjykata e Fierit, me vendimin e datës 7 shtator 2009, e ka dënuar me 25 vjet heqje lirie për kryerjen e veprës penale të “Vrasje me paramendim për gjakmarrje e kryer në bashkëpunim”, “Vrasje me paramendim për gjakmarrje” e kryer në bashkëpunim mbetur në tentativë, “Mbajtje pa leje të armëve të zjarrit”. Sipas Policisë së Shtetit, Erion
Hasanbelli në bashkëpunim me vëllanë e tij Geron Hasanbelli kanë vrarë shtetasit Julian Çela dhe plagosur Kasandër Noga, ku ky i fundit dyshohet se ka lidhje të forta me botën e errët të krimit. Ai gjithashtu është përfshirë në disa ngjarje të rënda kriminale si atentati ndaj Sokol Çapjas dhe Bledar Muçës. Shërbimet e policisë janë njoftuar për ngjarjen rreth orës 20:20 pas thirrjeve në numrin e urgjencës, teksa dëshmitarët raportuan për një sërë të shtënash në qendër të kryeqytetit belg, në lagjen “Place De Brouckère”. Kryebashkiaku i Brukselit, Philippe Close dënoi të shtënat dhe siguroi se policia po bën gjithçka që mundet për të garantuar sigurinë e vizitorëve në kryeqytet. “Shpresoj që policia të mund të arrestojë autorët sa më shpejt të jetë e mundur. Janë mobilizuar shumë patrulla. Dua të theksoj se të gjithë duhet të ndihen të sigurt në Bruksel dhe ne po bëjmë gjithçka që mundemi me ndihmën e shërbimeve të policisë”, shkroi ai në “Twitter”.