Ironia e Spiropalit: Fronti i ri opozitar? Ata janë UTUPIA
“Mund t’i sugjeronim ta quajnë Aleanca e Gjirit të Lalzit apo…!”
Ministrja e Shtetit për Marrëdhëniet me Parlamentin, Elisa Spiropali, tha mbrëmjen e së hënës se gjuha e përdoru nga Sali Berisha e ka “ndotur” ambientin e parlamentit. Duke folur për emisionin “Kontrast” në “Report TV”, Spiropali shtoi se Partia Socialiste nuk ka ndërmend t’i përgjigjet Berishës dhe mbështetësve të tij me të njëjtën gjuhë, pasi aleancën ajo e ka me publikun. “Opozita është në një situatë të vështirë dhe katandisje që ka filluar të ndikojë edhe aromën në parlament. Po të shihni është gjuha tipike e Sali Berishës që ka infektuar edhe plot të tjerë. Me njerëz që nuk kanë dalë nga emancipimi i ulët politik e ke gjithmonë e më të vështirë të komunikosh. Por ne kemi parasysh që përballë së pari kemi publikun. Nuk do të ketë asnjë shans që Partia Socialiste të transformohet në atë nivel në skenën politike apo në qeverisje”, – tha ajo. Spiropali ironizoi edhe shpalljen e frontit të ri opozitar nga Sali Berisha. Ministrja deklaroi se ky front mund të kishte shumë mirë disa emra që përkojnë me sjelljen e PD-së dhe LSI-së.
“Mund t’i sugjeronim Aleanca e Gjirit të Lalzit apo Aleanca e Sovranistëve Shqiptarë. Sepse kanë shpallur sovranitetin ndaj partnerëve amerikanë, edhe pse atyre u kemi borxh ekzistencën e dy shteteve shqiptare që kemi sot. Unë e shoh frontin e ri opozitar si ‘UTUPIA’ (Ushtria e Turpit të Ushtarëve Pa Ide e pa Atdhe)”, – tha Spiropali. E pyetur për ndryshime të mundshme në qeveri, ministrja u shpreh se ekipi aktual është në formë. Sipas Elisa
Spiropalit, Partia Socialiste është e gatshme në çdo moment që të formojë një kabinet të suksesshëm qeveritar, falë burimeve njerëzore që ka. “Unë i shoh ministrat në formë. Qeverinë e shoh të motivuar, kryeministrin dhe ekipin. Pastaj ne jemi lojtarë që kur japim shenja lodhjeje, vjen dikush tjetër në kabinet. Partia Socialiste i ka të gjitha kapacitetet për të formuar në çdo moment një qeveri shumë të mirë”, – tha Spiropali.