Harta e re gjyqësore, kreu i PD-së: Në kundërshtim me Kushtetutën

Berisha: Heqja e taksës në Rrugën e Kombit dhe njohja e gjenocidit serb, dy vendimet e para të qeverisë së ardhshme të PD-së “Asnjë vend tjetër s’ka guxuar të shkatërrojë sistemin e drejtësisë”

Harta e re gjyqësore, ligji i fiskalizimit dhe ndryshimet në ligjin për tatimet mbi të ardhurat ishin dje pjesë e diskutimeve në tryezën e PD-së me profesionistët e drejtësisë. Në këtë takim i pranishëm ishte edhe kryetari i PD-së, Sali Berisha. Gjatë fjalës së tij, Berisha tha se harta e re gjyqësore është në kundërshtim flagrant me Kushtetutën. “Harta e re gjyqësore, që vjen në kundërshtim flagrant me Kushtetutën, ligji për organizmin e drejtësisë, është kapaku që i vihet arkivolit në të cilin e mbylli reforma e drejtësisë, sistemin e drejtësisë në Shqipëri. Shqipëria kaloi në një proces unik në planetin Tokë, asnjë vend, asnjë komb, asnjë pushtues nuk ka guxuar t’i shkatërrojë një vendi tjetër, një kombi, sistemin e drejtësisë. Për arsye të caktuara, fusha ta caktuara janë të detyruara të respektojnë konventën”, - tha Berisha. Sakaq, në këtë tryezë dhanë argumentet e tyre specialistë të profesioneve të lira të lidhur në mënyrë direkte apo indirekte me sistemin gjyqësor. Pjesëmarrës ishin avokatë nga Dhomat e Avokatisë në Tiranë, Durrës,

Elbasan dhe Korçë; Lorval Petani, Genc Gjokutaj, Ankelita Çela, Arben Lena, kryetarja e Dhomës së Ndërmjetësuesve Drita Avdyli; Ylli Manjani avokat nga Dhoma e Avokatisë në Tiranë. Organizatorja e tryezës, kryetarja e Komisionit të Apelimit në PD-së, Adriana Kalaja, theksoi: “Objekti i takimit janë diskutime dhe propozime nga profesionistë të fushës mbi sfidat në sistemin e drejtësisë si dhe ndikimi i hartës së re gjyqësore, ligji i fiskalizimit dhe ndryshimet e ligjit për tatimin mbi të ardhurat në profesionet e lira. Po kështu, janë të mirëpritur të gjitha idetë dhe propozimet për zgjidhjen e këtij ngërçi me pasoja direkte në të gjithë sektorët jetikë të vendit”, shprehet Adriana Kalaja. Në tryezën e përbashkët për sfidat me sistemin gjyqësor, kreu i PD-së, Sali Berisha, tha se harta e re gjyqësore është në kundërshtim me Kushtetutën. Berisha u shpreh kritik, ndërsa theksoi se opozita ka qenë kundër metodës nga lartposhtë, duke shtuar se harta e re gjyqësore është në kundërshtim edhe me parimin e afërsisë. Më tej, kreu i PD-së, shtoi se reforma e Sorosit e shkatërroi sistemin e drejtësisë. “Shqiptarëve iu mohua një sistem i drejtë. Ju ftoj ta vazhdoni betejë deri në ritkthimin e vlerave të vërteta të sistemit të drejtësisë. Sot tashmë një shtyllë vertebrore e shtetit shqiptar është e prerë në mes dhe nuk funksionon”, tha Berisha. Kreu i Partisë Demokratike, Sali Berisha, zbuloi dy vendimet e para, që sipas tij, do të firmosë qeveria e ardhshme e PD-së, në marrëdhëniet me Kosovën. Duke folur për gazetarët mbi mbledhjen e dy qeverive, të Shqipërisë e Kosovës, Berisha akuzoi

Edi Ramën se nuk njohu gjenocidin serb në Kosovë, ndërsa shtoi se “krahas njohjes së gjenocidit, do të jetë marrëveshja e parë, përveç heqjes së taksës në Rrugën e Kombit, që do të firmoset nga qeveria e ardhshme e PD-së”. “Edi Rama në qoftë se do të kishte minimumin e respektit për qytetarët e Kosovës, vuajtjen dhe sakrificën e tyre, martirizimin e tyre në më shumë se 150 vitet e fundit, duhet të shkonte këtë herë në Kosovë duke njohur gjenocidin ciklik serb në Kosovë. Janë 1400 qenie të pafajshme që u vranë e u dogjën vetëm e vetëm se kishin prindër shqiptarë në shtëpitë e tyre. Në këtë aspekt mohimi që ai i bën gjenocidit ciklik serb në Kosovë, që fillon nga gjysma e dytë e shekullit të 19 dhe përfundon me operacionin ‘Patkoi’ në 1999-ën është një aktakuzë shumë e rëndë për karakterin dhe ndërgjegjen kombëtare. T’i mohosh këto është një lloj si të shkelmosh mbi shpirtrat, gjakun e tyre, por kur këta janë shqiptarë, kjo është forma më e lartë e tradhtisë kombëtare. Ndaj dhe unë mund të kem shumë probleme tjera për të shtruar sot në marrëdhëniet mes Shqipërisë e Kosovës, por zgjodha vetëm këtë, sepse edhe marrëveshjet, unë i ndoqa recitimet e përfaqësuesve të qeverisë shqiptare, në një kohë kur shqiptarët presin një marrëveshje, dyshtetësinë, apo shtetësinë sipas dëshirës, kjo është marrëveshja që presin shqiptarët, por këtë natyrisht, krahas njohjes së gjenocidit, do të jetë marrëveshja e parë, përveç heqjes së taksës në Rrugën e Kombit, që do të firmoset nga qeveria e ardhshme e PD”,- u shpreh Berisha.