Meta: Të krijohet komision i posaçëm parlamentar për parkun e Butrintit
Paralajmërimi: Ky është një sistem që do të shkundet nga themeli, duke nisur nga 25 korriku “E papranueshme, që shteti të heqë dorë nga këto pasuri”
Presidenti i Republikës, Ilir Meta, paralajmëroi dje shkundje nga themelet të sistemit pas 25 korrikut. Pasi u pyet nëse u druhet kallëzimeve të tjera, pasi SPAK-u ka regjistruar kallëzimin penal të ish-deputetit Halit Valteri sa i përket lobimit të pretenduar me paratë e korrupsionit, i bërë publik nga gazeta austriake, Meta tha se këto lajme janë absurde si vetë personazhet dhe se kjo është një histori, që as nuk ka ekzistuar dhe as nuk ekziston. “Këto lajme absurde si vetë personazhet që i njihni të gjithë nuk krijojnë asnjë shpërqendrim jo vetëm nga detyrat e rëndësishme që ka presidenti deri më 24 korrik, por edhe nga angazhimet e z. Ilir Meta duke nisur nga 25 korriku. Gazeta austriake do ta marrë përgjigjen. Kjo është një histori që as nuk ka ekzistuar dhe as nuk ekziston. Ata që janë në Vjenë në kërkim të letrave për azil për t’i shpëtuar drejtësisë këtu dhe të tjerët që janë këtu e vijojnë biznesin e inceneratorëve të vijojnë të bëjnë më të mirën e tyre. Ky është një sistem që do të shkundet nga themeli duke nisur nga 25 korriku, por deri më 24 korrik do të bëjmë detyrën me përgjegjshmëri të plotë”, - deklaroi Meta. Presidenti i Republikës, Ilir Meta, ka dalë dje para mediave për të folur për çështjen e Butrintit. Z. Meta tha se është e papranueshme, logjika që për pasuri të tilla si Butrinti, me rëndësi historike, shteti të heqë dorë nga çdo përgjegjësi. Ai bëri apel që kjo çështje të marrë kohën e nevojshme dhe të trajtohet me kujdesin maksimal nga Kuvendi i Shqipërisë. “Parku Kombëtar i Butrintit është një pasuri e paluajtshme e regjistruar në listën botërore të UNESCOs. Sipas Konventës së Parisit, përgjegjësia mbi këto objekte nuk mund të kalojë në OJF, por mbetet te shteti. Shteti nëse do të aplikojë këtë formë të re administrimi nëpërmjet një fondacioni, duhet të ruante rolin e tij.
Presidenti i Republikës nuk është kundër formave të bashkëpunimit shtet-privat, aq më pak me Fondin Shqiptaro-Amerikan, por është e papranueshme logjika që për pasuri të tilla si Butrinti, me rëndësi historike, shteti të heqë dorë nga çdo përgjegjësi. Nëse qeveria sot
deklaron sot mosgarantimin në perspektivë të vlerave, si mund ta garantojë atë me një pjesëmarrje në një fondacion ku rolin dhe vendimmarrjen e ka të kufizuar?! Kjo çështje duhet të marrë kohën e nevojshme dhe të trajtohet me kujdesin maksimal nga Kuvendi i Shqipërisë”,
- tha Meta. Presidenti ka kthyer dje për rishqyrtim në Kuvend Marrëveshjen për Administrimin e Parkut të Butrintit. Sipas Presidentit Meta: “Kjo marrëveshje cenon dispozita konkrete të Kushtetutës dhe parimet kushtetuese të shtetit të së
PJESË NGA DEKLARATA:
Për të gjitha konstatimet, edhe një herë tjetër vlerësojmë se ky ligj:
– Cenon dispozita konkrete të Kushtetutës dhe parimet kushtetuese të shtetit të së drejtës.
– Cenon parimet dhe vlerat universale që mbrohen që në Preambulën e Kushtetutës, duke cenuar kësisoj drejtpërdrejtë interesin publik shqiptar.
– Cenon Konventën e Parisit dhe nuk është në harmoni me parimet e mbrojtura nga UNESCO-ja.
– Bie ndesh me jurisprudencën e Gjykatës Kushtetuese.
– Praktika e ndjekur nga ekzekutivi dhe Kuvendi i Shqipërisë rezulton se nuk ka realizuar dhe nuk ka siguruar mendimin e ekspertizës së pavarur vendase, që ka njohuri të thelluara mbi Parkun Kombëtar të Butrintit, nënzonave dhe siteve arkeologjike të tij.
– Procedura e ndjekur nuk ka garantuar një proces të gjerë e të thelluar të konsultimit me publikun, duke sjellë kështu një produkt jo cilësor dhe një debat publik mbi këtë çështje.
– Shmang auditimin përmes institucioneve të pavarura kushtetuese të veprimtarisë ekonomike-financiare lidhur me të ardhurat që do të krijohen dhe mënyrën e përdorimit të tyre.
– Për shkak të mungesës së konsultimit gjithëpërfshirës, ky ligj është produkt i një procesi që ka shkelur rezolutën e datës 19 maj 2022, të miratuar nga Parlamenti Europian.
Si President i Republikës vlerësoj se në mbështetje të Kushtetutës së Republikës së Shqipërisë, si dhe nenit 24 të Rregullores së Kuvendit, kjo çështje hyn pikërisht në llojin e atyre çështjeve të një rëndësie ekstremisht të veçantë, e cila kërkon kujdes të lartë nga organet shtetërore dhe për këtë Kuvendi i Shqipërisë, duhet të miratojë dekretin e presidentit dhe të vlerësojë sugjerimin për ngritjen e një Komisioni të Posaçëm Parlamentar, i cili përmes një procesi të gjerë dhe solid konsultimi e diskutimi, të mund të prodhojë produktin më të mirë, e përmes një dakordësie të gjerë t’u ofrojë brezave që vijnë zgjidhjen më të mirë për Parkun Kombëtar të Butrintit dhe gjithë pasuritë të çdo lloji, pjesë të tij.