Liderët e “Ballkanit të Hapur”, drejt bojkotit të samitit me BE-në

Kryeministri: Unioni i rrëmbyer nga Bullgaria nuk është një spektakël i mirë për t’u parë Rama: Sot vendosim nëse do të marrim pjesë

Kryeministri Edi Rama është shpre hur se BE-ja është rrëmbyer nga Bullgaria, e cila nuk do të heqë veton ndaj Maqedonisë së Veriut, duke bllokuar kështu edhe çeljen e negociatave për vendin tonë. Me anë të një postimi në “Twitter”, Rama tha se liderët e Serbisë, vendit tonë dhe Maqedonisë së Veriut kanë diskutuar gjatë nëse duhet të marrin pjesë në samitin e ardhshëm apo jo. Ashtu si edhe më herët gjatë një konference me kryeministren e Finlandës, Rama tha se nuk pritet një zhvillim pozitiv në këtë samit për vendet ballkanike dhe integrimin e tyre. “Ne diskutuam gjatë sot me liderët e Serbisë dhe Maqedonisë së Veriut për samitin e ardhshëm të BEsë. Duket se një tjetër ‘Jo, më fal!’, do të jetë ajo, që do të dëgjojmë në fund! I gjithë Unioni i rrëmbyer nga Bullgaria nuk është një spektakël i mirë për t’u parë! Çfarë duhet bërë atje?!”, - ka shkruar Rama në “Twitter”. Liderët e vendeve pjesëmarrëse të “Ballkanit të Hapur” thanë se të mërkurën do të njoftojnë nëse do të shkojnë në Samitin Bashkimi Evropian-Ballkani Perëndimor, i cili do të mbahet më 23 qershor në Bruksel. “Pas konsultimeve me qeveritë dhe këshilltarët tanë, jemi marrë vesh që nesër në mesditë ta tregojmë vendimin tonë nëse do të marrim pjesë në këtë tubim”, - ka shkruar presidenti serb, Aleksandar Vuçiç, në “Instagram”. Liderët e gjashtë vendeve të Ballkanit Perëndimor janë ftuar në Bruksel në ditën e parë të Samitit të Liderëve të BE-së, që do të mbahet më 23 dhe 24 qershor. Vuçiç tha se pjesëmarrjen në samitin e ardhshëm të BE-së e ka diskutuar në mëngjes me videolidhje me kryeministrat e Shqipërisë dhe Maqedonisë së Veriut, Edi Rama dhe Dimitar Kovaçevski. “Kemi shkëmbyer gjithashtu mendime për hapat e ardhshëm të nismës sonë ‘Ballkani i Hapur’ – panairi i verës, i cili do të mbledhë verëtarët më të mirë nga rajoni, si dhe për takimin e ardhshëm, ku do të diskutojmë çështje të shumta me interes për qytetarët tanë”, - tha Vuçiç. “Së bashku po luftojmë për një perspektivë të qartë të Ballkanit Perëndimor, bashkëpunim edhe më të fortë dhe lidhje më të mira”, - shtoi presidenti serb. Në nismën “Ballkani i Hapur” bëjnë pjesë Shqipëria, Serbia dhe Maqedonia e Veriut. Në samitin e 23 dhe 24 qershorit, liderët e 27 vendeve anëtare të BE-së do të marrin në konsideratë aplikimet për statusin e vendit kandidat të Ukrainës, Moldavisë dhe Gjeorgjisë.