Vrasja e Pjerin Xhuvanit, Artan Hoxha: Është filmuar nga një kamera sigurie, ja kush qëlloi i pari
TIRANË - Gazetari Artan Hoxha ka komentuar arrestimet e djeshme në Elbasan, ku u vendos masa “arrest në shtëpi” për dy nëndrejtuesit e policisë, Albert Nushi dhe Nikollaq Palla, por edhe u pezulluan nga detyra 6 efektivë të tjerë. Veprimet e SPAK-ut janë ndërmarrë si rezultat i hetimeve për vrasjen e Pjerin Xhuvanit në Elbasan, për të cilën Hoxha pretendon se ekziston një video, që e tregon qartë mungesën e reagimit nga policia, por edhe se cila nga palët ka qëlluar e para me armë katër ditë para zgjedhjeve. Hoxha thotë se një kamera sigurie e vendosur larg nga vendi i ngjarjes ka filmuar të gjithë skenën. “Kamera ka qenë larg, por cilësia e imazhit është shumë e lartë dhe çdo gjë duket qartë”, - tha Hoxha për “AbcNews” teksa sqaroi se imazhet janë nën ruajtjen e SPAK-ut, që ka rindërtuar skenën e krimit. Sa u përket efektivëve dhe nëndrejtorëve, Hoxha thotë se ata janë sot në procedim penal sepse janë përgjegjës për atë që ka ndodhur. Ndërkohë ai shtoi se i ka parë pamjet e filmuara dhe bën me dije se të parët që qëlluan ishin anëtarët e Strukturës së Mbrojtjes së Votës të PD-së. “Policia ishte më e pakët në numër, edhe se ata që ishin edhe se ata që erdhën. Këta që erdhën ishin të njohur në qytet, s’i prekte dot. Ata nuk patën kurajë të vepronin. Kurse opozita pati përgjegjësinë e zmadhimit të ngjarjeve. Shkoi në Elbasan SMV, atë mëngjes. Në ‘Elbasan Arena’ një ditë më parë u bë një takim i madh, që krijoi përshtypjen se mazhoranca kishte epërsi të madhe në Elbasan. Opozita donte të tregonte forcën… Nuk shkuan kot, por ai u doli që s’kishte gjë. Nuk do t’i shpërndante paradite lekët”, - rrëfeu gazetari. Artan Hoxha tregoi po ashtu se asnjë nga palët nuk ka bashkëpunuar me policinë. Sipas tij, dëshmitarët kanë frikë kurse të përfshirët kanë bërë një pakt “të vdekurit ikën, të shpëtojmë të gjallët”.