Arrestimi i Fatos Tushes, avokati: Lidhjen me Ibrahim Lamin e kishte nga Bashkim Fino, akuzat s’janë objektive
Ish-kryebashkiaku i Lushnjës: S’kam bërë shkelje me tendera, kërkoj pafajësi!
Ish-kryetari i Bashkisë Lushnjë, Fatos Tushe, doli ditën e djeshme para gjykatës, rreth një vit pasi u arrestua. Gazetarja Anila Hoxha tha për “Top Channel” se Tushe hodhi poshtë të gjitha akuzat e Prokuroria e Posaçme kundër Korrupsionit dhe Krimit të Organizuar duke thënë se nuk ka bërë shkelje në tendera dhe se ishte detyra e tij të kujdesej për banorët e zonës dhe në këtë mënyrë ka kërkuar pafajësinë. Nga ana e SPAK-ut është kërkuar dënim me 5 vite burg për ish-kryetarin e bashkisë, ndërsa ky i fundit ka kërkuar pafajësi. Nga ana tjetër avokati Tushes ka bërë me dije lidhjen e ish-kryebashkiakut me shtetasin Ibrahim Lami, me të cilin sipas tij kishte kontakte prej të ndjerit ish-deputetit Bashkim Fino. Ibrahim Lami dyshohet se është biznesmeni, kompania e të cilit përfitoi tenderin nga Bashkia e Lushnjës, por avokati i Tushes ka bërë me dije se diçka e tillë nuk është e vërtetë. Po ashtu, avokati mbrojtës i ish-kryebashkiakut Tushe me Lamin janë takuar në mënyrë që ky i fundit t’i përcillte Bashkim Finos vonesat që do të bëheshin në rehabilitimin e kanalit ujitës. Ky takim mes tyre u bë pasi Tushe nuk kishte kontakt me Finon dhe ish-deputeti ishte në gjendje të rëndë atë kohë. “Pavarësisht pretendimit të organit të akuzës se kjo bisedë është bërë në kontekst tjetër ku i mbrojturi prej meje për shkak se nuk kishte komunikim tel me deputetin e zonës Bashkim Fino për shkak të gjendjes shëndetësore të tij, i ka shprehur shtetasit Ibrahim Lami për shkak se takohej fizikisht me të ndjerin dhe t’ia transmetonte atij këtë fakt për vonesat që po bëheshin në këtë rehabilitim të kanalit ujitës. Pasi ka qenë deputeti i zonës, z.Fino, i cili ishte i interesuar për përfundimin sa më të shpejtë të këtij rehabilitimi për shkak se kishte shumë pakënaqësi nga banorët e zonës dhe ky ka qenë dhe interesimi për një përfundim sa më të shpejtë të këtij projekti dhe të gjitha bisedat janë në kontekst të zgjidhjes sa më të shpejtë të situatës së krijuar dhe pakënaqësisë së banorëve”, - u shpreh avokati i Tushes.
FJALA E PLOTË E AVOKATIT:
Së pari, në lidhje me këtë fakt duam t’ju sqarojmë e nderuar gjykatë se në shpjegimet që i mbrojturi prej nesh ka dhënë gjatë fazës së hetimeve paraprake, ka cituar ndër të tjera se me shtetasin Ibrahim Lami njihet prej më shumë se 10 vitesh për shkak se deputeti i zonës, i ndjeri Bashkim Fino, e ka pasur njeriun e tij dhe vinin shpesh në Lushnje për shkak të angazhimeve politike dhe në këto kushte, ata kanë krijuar miqësi, pasi angazhohej në fushata elektorale dhe merrte pjesë në mbledhjet e shtabit elektoral që zhvilloheshin në qytetin e Lushnjës. Edhe transkripti i sipërcituar që i është bërë nga organi i akuzës edhe për këtë fakt nuk ka asnjë nënkuptim tjetër përveçse zhvillimit të mbledhjes së radhës që kishin për të bërë në qytetin e Lushnjes në funksion të zhvillimeve politike. Në lidhje me pretendimet e organit të akuzës ku citohen disa transkipte të tjera të datës ndërmjet shtetasit Fatos Tushe dhe shtetasit Ibrahim Lami, ku ndër të tjera thuhet në lidhje me një ankim të bërë nga një kompani, e cila ka marrë pjesë në një tender e ka bërë ankim! Pavarësisht pretendimit të organit të akuzës, kjo bisedë është bërë në kontekst tjetër, ku i mbrojturi prej meje për shkak se nuk kishte komunikim telefon me deputetin e zonës, Bashkim Fino, për shkak të gjendjes shëndetësore të tij dhe i ka shprehur shtetasit Ibrahim Lami për shkak se takohej fizikisht me të ndjerin që t’ia transmetonte atij këtë fakt për vonesat që po bëheshin me rehabilitimin, për shkak se kishte shumë pakënaqësi nga banorët e zonës dhe ky ka qenë dhe interesimi për një përfundim sa më të shpejt të këtij projekti dhe të gjitha bisedat janë në kontekst të zgjidhjes sa më të shpejtë të situatës së krijuar dhe pakënaqësisë së banorëve… I mbrojturi prej nesh kishte në këtë funksion si kryetar bashkie prej më shumë 12 vitesh dhe në asnjë moment nuk ka pasur ndikim në procedurat e tenderave apo ankandeve publike, pasi dhe në vitet paraardhëse ka pasur procedurë tenderimi dhe nuk është gjetur asnjë shkelje nga ana e prokurorisë e Cila ka sekuestruar një sërë dokumentacioni në lidhje me këto procedura dhe as nga Kontrolli i Lartë i Shtetit, ku janë bërë
ARRESTIMI
audite në lidhje me fondet e Bashkisë Lushnje dhe nuk janë gjetur shkelje apo shpërdorime të këtyre fondeve. Organi i akuzës shprehet në diskutimin përfundimtar në lidhje me procedimin penal me nr. 199, datë 22.07.2020 se në këtë procedurë prokurimi të zhvilluar nga NPP pranë Bashkisë Lushnje, në vitin 2020 janë evidentuar shkelje ligjore, të kryera nga shtetasi Fatos Tushe etj.. Por, nuk kemi parë një arsyetim ligjor se ku konsiston shkelja ligjore e të mbrojturit prej meje në rastin konkret. Pasi i mbrojturi prej meje nuk ka asnjë kompetenca apo funksion në lidhje me procedurat e prokurimit, të delegoj apo të nënshkruaj akte në funksion të kësaj procedure prokurimi kjo referuar edhe Ligjit 8652, datë 31.7.2000 “Për organizimin dhe funksionimin e qeverisjes vendore (Ndryshuar me ligj nr .9208, datë 18.3.2004), ku përcakton funksionet që kryen kryetari i bashkisë! Për këto arsye mendojmë se organi i akuzës nuk ka bërë një vlerësim objektiv në lidhje me përgjegjësinë ligjore të të mbrojturit prej nesh, por ia atribuon këtë fakt vetëm se ka pasur detyrën e kryetarit të Bashkisë dhe sipas aludimeve të organit të akuzës ka ndikim pa e provuar me këtë fakt me prova konkrete. Edhe në diskutimet përfundimtare organi i akuzës u shpreh gjithmonë se për shkak të pozicionit të tij Fatos Tushe ndikonte në vendimmarrjet e NPP Ndërmarrja e Pasurive Publike apo KVO Komisioni i Vlerësimit të Ofertave apo KSHA Komisioni i Shqyrtimit të Ankesave. Organi i akuzës duhet të flasë me fakte dhe prova dhe jo me supozime! Si gjatë hetimit dhe sot në gjykim në asnjë moment nuk citohet nga organi i akuzës se kush ka deklaruar që kryetari i bashkisë ka ndikuar, apo ka dhënë orientime sipas preferencave të tij.