Shtyhet procesi/ Luftar Reçi 5 orë ballafaqim me ish-bandën e Durrësit për 2 vrasje, GJKKO u jep më shumë kohë avokatëve
TIRANË - Në Gjykatën e Posaçme kundër Korrupsionit dhe Krimit të Organizuar (GJKKO) u zhvillua dje me dyer të mbyllura, seanca e ballafaqimit mes të penduarit të drejtësisë Luftar Reçi dhe të pandehurve Viktor Ymeri, Emiljano Shullazi, Indrit Taullai, Indrit Rusi, Lulzim Berisha, Plaurent Dervishaj (të dy në kërkim), të akuzuar për vrasjen e Klodian Saliut e Vajdin Lames. Pas më shumë se 4 orësh seancë, gjykata vendosi shtyrjen e saj për më datën 3 prill, në orën 9:00. Mësohet se procesi për Emiliano Shullazin dhe të pandehurit e tjerë u shty, pasi do t’u jepet kohë avokatëve për të pyetur dhe ballafaquar me të penduarin Luftar Reçi. Nga burgu i Drenovës ku vuan dënimin, Reçi u transportua drejt GJKKO nën masa të rrepta sigurie, pasi kërkesa e tij për të dëshmuar me “Skype” nuk u pranua. Përfaqësuesja
e Prokurorisë së Posaçme i kërkoi gjykatës që në sallë të qëndronin vetëm palët, duke kërkuar nxjerrjen e medias jashtë për shkak të sekretit hetimor. Avokatët e të pandehurve Plaurent Dervishaj dhe Indrit Rusi kërkuan rrëzimin e kërkesës së prokurorisë, pasi dëshmia e Luftar Reçit është bërë publike. Të njëjtin mendim ndanë edhe avokatët e Emiljano Shullazit dhe Viktor Ymerit, të cilët kërkuan që seanca të bëhet me dyer të mbyllura, kërkesë që u miratua nga gjykata. Sipas informacioneve nga seanca, Luftar Reçi ka dëshmuar në gjykatë për përfshirjen e Viktor Bajraktari (Imeraj), Emiljano Shullazi, Indrit Taulla, Lulzim Berisha, Plarent Dervishaj, Indrit Rusi në dy vrasje. Gjatë më shumë se 5 orëve ballafaqim, mësohet se shpeshherë në sallën e gjyqit kishte edhe tone të ashpra. Pasi i penduari dhe prokuroria mbaruan me ballafaqimin, avokatët i kërkuan trupës gjykuese që seancën ta shtyjnë më datën 3 prill në orën 9:00 për shkak se duhet të përgatiteshin për të kryer pyetje ndaj bashkëpunëtorit të drejtësisë, Luftar Reçit. Ai do të sillet në ambientet e gjykatës në seancën e radhës i shoqëruar me efektivë policie dhe masa shtesë. I penduari ishte një nga 7 të pandehurit e SPAK, të cilët nën operacionin “Asgjë nuk harrohet” janë dërguar në gjykatë si autorë të grupeve kriminale që ekzekutuan në 2005 Klodian Saliun, Vajdin Lamen dhe shtetasin Artan Arsi.