Kryeministri Rama sfidon hapur DASH-in, sulmon “Prestige Resort” në ditë pushimi
Autoritetet marrin në administrim arbitrarisht dy godina të kompleksit “Prestigj” Raporti amerikan evidentoi shkatërrimin e kompleksit
Kryeministri Edi Rama ka sfiduar hapur dje Departamentin Amerikan të Shtetit, që vetëm pak ditë më parë fliste për lirinë e medias. Në një ditë pushimi siç është 22 marsi, kreu i qeverisë ka urdhëruar institucionet e varësisë të mësyjnë në ambientet e “Prestige Resort” për të konfiskuar godinat, pa një njoftim paraprak dhe mbi të gjitha, pa një vendim gjykate. “Nëse po thoni që na jepni kohë për të liruar godinën, duhet të na kishit njoftuar zyrtarisht më përpara dhe jo të vinit në një ditë pushimi zyrtar. Për sot nuk keni sjellë njoftim zyrtar”, - tha avokati i “Hysenbelliu Group”. Shembja e “Prestige Resort” ka zënë vend në raportin e Departamentit Amerikan të Shtetit për vitin e kaluar. Ky sulm ndaj një biznesi përmendet në raport si një trysni mbi mediat. “Më 4 dhjetor, Inspektorati Kombëtar për Mbrojtjen e Territorit prishi një hotel, duke përmendur shkelje të rënda të ligjeve të ndërtimit. Në datën 1 dhjetor, kompania e ndërtimit të resortit kishte depozituar një padi në Gjykatën Administrative të Durrësit, duke kërkuar një vendim në pritje të shqyrtimit ligjor të urdhrit të prishjes së IKMT. Gjykata nuk e caktoi menjëherë gjyqtarin dhe IKMT vazhdoi me shembjen. Pronari i hotelit, i cili gjithashtu zotëron disa media dhe biznese të tjera, pretendoi se hoteli i tij u shkatërrua për të mbytur kritikat dhe mospajtimet. Qeveria pohoi se veproi në përputhje me ligjet në fuqi dhe se kjo prishje ishte pjesë e një fushate më të gjerë për të çrrënjosur ndërtimet e paligjshme në vend”, - thuhet në raport e DASH. “Vazhdon shqetësimi se kritikat e hapura ndaj qeverisë mund të kenë pasoja negative”, - thuhet haptas në raport.
ZËRI ZËRI I I AMERIKËS AMERIKËS
Shërbimi Social Shtetëror u paraqit dje në mjediset e “Prestigj Resort”, për të marrë në administrim dy godina hoteliere të këtij kompleksi, të cilat rezultojnë të jenë konfiskuar me një vendim të Këshillit Kombëtar të Territorit. Kompleksi turistik është në pronësi të grupit “Hysenbelliu”, i cili zotëron gjithashtu edhe disa media të rëndësishme në vend. Përfaqësuesit ligjorë të kompanisë deklaruan se çështja është në proces gjyqësor dhe për pasojë marrja në administrim e dy godinave është, sipas tyre, e paligjshme. Vendimi i djeshëm pason ndërhyrje të mëparshme në këtë kompleks, ku në dhjetor u shemb godina qendrore disakatëshe. Sipas “Hysenbelliu Group”, qeveria kërkon të ndikojë në linjën editoriale të mediave që kompania ka në kontroll. Edhe pse një ditë pushimi zyrtar, përfaqësuesit e Shërbimit Social Shtetëror, të shoqëruar edhe nga forca policie shkuan dje në kompleksin turistik “Prestigj Resort”, në Golem, me në duar një vendim të qeverisë “i cili i kalon në përgjegjësi administrimi Ministrisë së Shëndetësisë për Shërbimin Social Shtetëror të godinave nr. 1 dhe nr. 3”, - njoftoi përfaqësuesja e Ministrisë së Shëndetësisë. Vendimi pason një akt konfiskimi të dy godinave nga ana e Këshillit Kombëtar të Territorit, si pjesë e masave kundër ndërtimeve pa leje apo në shkelje të tyre. Për përfaqësuesit e “Hysenbelliu Group”, veprimet e djeshme konsiderohen të paligjshme. “Nuk e di kush ia kaluar Ministrisë së Shëndetësisë, apo Ministrisë së Financave, posedimin e sendit. Ne nuk e kemi humbur ndonjëherë. Që do të thotë se procedura e konfiskimit është kontestuar në gjykatë dhe është duke vijuar procesi gjyqësor. Si rrjedhim, nëse ju pretendoni se jeni pronarë, se ne vlerësojmë se nuk jeni, sipas ligjit për pronat e paluajtshme të shtetit, normalisht ato trajtohen në barazi me pronat private, që do të thotë se duhet t’i drejtoheni gjykatës, sipas Kodit Civil dhe të paraqisni pretendimet tuaja. Veprimi juaj, duke kërkuar që të lirohet godina dhe të na nxirrni jashtë vlerësohet nga ne si i paligjshëm, i parregullt dhe si pasojë nuk e zbatojmë”, - deklaroi avokati i kompanisë, Erion Kanxheri. Ata pretenduan gjithashtu se nuk kishin marrë asnjë njoftim paraprak, ndonëse përfaqësuesja e Shërbimit Social pretendoi të kundërtën, duke kërkuar mbështetjen e policisë për të hyrë në mjediset e kompleksit dhe marrjen në administrim të dy godinave, të cilat u gjetën të mbyllura. Për të hyrë brenda u gjetën më pas mënyra të tjera nga ana e policisë. Sipas avokatit të kompanisë, edhe përfshirja e policisë është e paligjshme, pasi ajo mund të ndërhyjë në mjedise private vetëm me urdhër gjykate apo prokurorie, ose në zbatim të vendimeve përmbarimore. Në shtator të vitit të kaluar Inspektorati i Mbrojtjes së Territorit ndërhyri duke prishur pishinat e jashtme të kompleksit turistik, ndërsa në muajin dhjetor hodhi në erë godinën qendrore disakatëshe. Rasti u përfshi edhe raportin vjetor të Departamentit amerikan të Shtetit për të Drejtat e Njeriut, të publikuar tri ditë më parë. Sipas “Hysebelliu Group”, veprimet e qeverisë synojnë të diktojnë linjën editoriale të mediave që kompania zotëron, televizione, gazeta e portale informative. Vetë televizionit “News 24” i është njoftuar një gjobë prej afro 200 mijë dollarësh nga ana e tatimeve, të cilën drejtuesit e televizionit e kanë konsideruar të padrejtë. Po ashtu, edhe biznese të tjera të grupit “Hysenbelliu” janë përballur kohët e fundit me gjoba disa miliona euroshe.